Ndau Shana Lam

Tsaw ra hkungga ai,
Nu wa, hpu nau, jinghku, manaw manang, laika hti masha ni yawng hpang de shiga nnan ndau shanan dat nngai.

Laiwa sai shata e shana lajin tawn sai hte maren Overseas Kachin Association Blog hpe jahkring kau nhtawm kaga tinggyeng website hpe madaw laika hti masha ni matut n-gun jaw lu na matu nnan hpaw hpang dat ai Website nnan hpe lawu na hkringdat(Link) kaw shang yu mai sai lam rai nga mali ai.

http://matsihkubum.com/ (shing nrai) www.matsihkubum.com

Ndai Website hpe byin wa na matu garum la ai myitrum ni(Kachinland News) hpe mung grai chyeju dum ai lam ndai laika hte masat masa galaw dat nngai rai.

OKA hpe 2009 ning kaw na daini du hkra madi shadaw laika shang hti ai ji nban yawng hpe grai chyeju dum ai lam mung masat masa galaw dat nngai law.

Matsihku Bum

Ndau Shana Lam

Ndau Shana Laika

Tsaw ra hkungga ai manaw manang ni, Laika hti shawa masha yawng hpang de Overseas Kachin Association Blog hpe Jinghpaw Wunpawng Amyu sha ni a rawt malan hkrun lam e amyu sha kunghpan galu kaba lam hta jut shara mi hku nna shanglawm na matu yaw shada let 2009 ning hkan na mai byin ai myitsu ni a shanglawm n-gun jaw ai marang hpaw hpang dat ai rai yang aten galu hta manaw manang ni bungli masa hta hkan nna Overseas Kachin Association blog kaw shanglawm laika ka ai lam ni ningra mat wa ai hte kaga mayak lam amyu myu a jaw e jahkring kau ra na tai mat sai lam ndau shana dat nngai.

Overseas Kachin Association ngu ai mying hte nre sha kaga ngai dinghkrai langai hku nna mying nnan langai hte matut hpaw mat wa na myit tawn nngai, bungli jin ngut ai masa hta hkan nna ndai Overseas Kachin Association blog kaw sha bai ndau shana lu ai hpang ndai Overseas Kachin Association blog hpe chyawm gaw pat shingdang kau na re lam matut shana dat nngai.

yawng hpe grai chyeju kaba sai.

Matsihku Bum

Hpa N-chye Yang N-gup Pat Tawn Ai Gaw Pi Tsingtsi A Hka!

Hpa N-chye Yang N-gup Pat Tawn Ai Gaw Pi Tsingtsi A Hka!

Israel – Hamas Majan grung kaba wa ai hte maren lahkawng maga na si sum ai hpyenla ni mung lani hte lani law wa ai hpe shiga ni kaw na chye lu ai, grau nna gaw majan ndai a majaw mara kata laknak nlang ai Palestine mung shawa masha(ma kaji ni malawng) ni si sum ai gaw grau law wa nga ai hpe mungkan masha yawng mu chye lu ai majaw myit kahpra myit kahtet let yu maram shiga madat nga ai aten rai nga ai. Majan byin hpang ai kaw na ya du hkra Gaza ginra e masha yawng marai 1,170 si sum mat sai rai yang mung shawa si ai marai 815, ma kaji ni si ai marai 232 rai sai hpe chyelu ai.

Palestine mung shawa masha si sum ai law wa ai majaw lahkawng maga na mara shagun Yungnu madi hkat wa ai lam mung law law rai nga ai, nkau tsun ai gaw “Israel hpyen hpung ni hku nna Palestine mung shawa ndai daram law ai hpe sat nat zingri nga ai gaw tara rap ra ai lam nnga ai” ngu dinglun ai ni nga ai zawn “Israel mung shawa nga ai mare ni de Hamas ni gap dat ai rockets ni hpe Israel hpyen dap a “Iron Dome” ngu ai prat dep laknak ni hte ninghkap makawp maga ai nrai yang mara kata Israel mung shawa Hkying, Mun hku nna si sum mat chyalu rai na re” ngu tsun ai mung law law rai nga ai.

Ndai majan hte si sum ai mung shawa ni hpe yu nna atang ahpa sha myit yang gaw grai ahkyak da aten shama na zawn nrai tim ndai majan a shingdu na mung masa manghkang hte shingdu labau ni gaw anhte nchye ai lam ni law law rai nga ai hpe sawn maram lu ai majaw ngai chye ai kachyi mi hpe garan gachyan dat ai lam rai nga ai.

Palestine amyu sha ni gaw Israel Asuya uphkang ai npu na garan pru nhtawm Awmdawm shanglawt ai mungdan langai gaw de sa wa na matu 1964 ning hta Palestine Liberation Organization (PLO) hpe hpaw ninghtan nhtawm mung masa hte hpyen masa woi hpang sai, nnang hpang wa ai ten gumshem, sat nat, zingri ai ladat amyu myu ni lang wa ai majaw UN, US hte Sinna mung ni PLO hpe nhkru n kaja ai laknak lang hpung( terrorist organization) ngu nna Madrid Conference galaw ai 1991 ning du hkra masat wa masai. 1993 ning hta PLO gaw sat nat zingri ai ladat (violence and terrorism) hpe koi gam nhtawm Israel amyu sha ni a nga pra lu ai ahkaw ahkang (right to exist) hpe masat masa galaw ai policy nnan a majaw Israel Asuya kaw nna mung PLO hpung gaw Palestine Amyu sha ni hpe numshawng woi awn ai Mung masa hpung langai hku nna masat masa galaw hpang wa sai. PLO hpe UN hte Arab League hpung ni kaw na masat masa galaw ai hte maren United Nations General Assembly kaw permanent observer shara hpe masat ya ai lam chye lu ai.

Yasser Arafat gaw PLO Executive Committee hta Chairman magam lit hpe 1969 kaw na shi si mat ai n’htoi 11 November  2004 du hkra magam gun lai wa sai. Yasser Arafat si mat ai hpang PLO kata Hamas hte Fatah hpung lahkawng lapran shada manghkang byin, hprai shai hkat wa sai. 2006 ning Palestine Amyu sha ra lata poi galaw ai shaloi Hamas hpung ni gaw Htam masum kaw na htam lahkawng shara dang la ai hpung rai nga ai, 2007 ning Hamas – Fatah Agreement hte maren Hamas gaw Gaza ginra e uphkang rung hpaw nna shara jahkrat nhtawm Fatah hpung gaw West Bank ginra e shara jahkrat mung masa shamu shamawt nga ai hpung rai nga ai, dai ten kaw na PLO ngu ai hpung mung nnga mat sai. Palestine Mung shawa masha ni gaw Gaza hte West Bank ginra Asuya Lahkawng npu e shanu nga ai hpe chye lu ai.

Hamas hte Fatah Asuya lahkawng hpe hkaja ai shaloi langai hte langai mung masa hte zai ladat nbung hkat ai hpe chye lu ai.

Hamas hpung gaw (1) shanhte a Ideology hpe chyam bra na matu sat nat zingri ai ladat hpe lang ai,  kadai amyu sha kaning re nawku hpung hpe raitim hkyamsa jaw ai lam nnga ai (2) Israel amyu sha ni nga pra ai lam (right to exist) hpe masat masa n galaw ai (3) Palestine amyu sha ni san san hpaw shabawn tawn ai hpung nre.

Mahmoud Abbas (Abu Mazen) woi awn ai Fatah hpung gaw (1) Israel Amyu sha ni a nga grin lam (right to exist) hpe masat masa galaw ai. (2) sat nat, zingri, gumshem ai lailen hpe koi gam ai. (3) Palestine Amyu sha ni hte hpaw shabawn tawn ai. (4) Palestine Christian ni hpe masat masa galaw ai sha n-ga Fatah Asuya hpung hta shang lawm na matu shara masat tawn ya ai.

Lahta e ngai sanglang ai hte Hamas, Fatah ni a lam yawng hkawn hkrang chye lu na ngu ai gaw nmai byin ai. Palestine amyu sha ni hpe lam woi nga ai ndai Hamas hte Fatah hpung ni a mung masa shamu shamawt ai lam ni hpe shinggan masha ni chye lu na yak ai zawn Shia hte Sunni Muslims ni a lapran sat nat hkat ai middle east mungdan ni a lapran na mung masa hpe chye na lu na matu gaw grau nloi nga ai. “Israel amyu ni gaw Yesu amyu ni re majaw” … “Palestine ni gaw muslim re majaw” ngu nna ntsa lam prau shalau myit nhtawm maga ga de n-gun njaw shi yang shawng hkaja maram ai gaw htap htuk nga ai, ngai langai tinggyeng hku nna gaw mara kata Palestine mung shawa ni si sum ai hpe Myi pat Na pat tawn nna Israel hpyen hpung ni mung shawa masha hpe sat nat, bawm jahkrat zingri zingrat nga ai hpe n-gun jaw ta hpawk dum lawm na nrai nngai.  Anhte Wunpawng amyu sha ni a ru-yak tsin-yam, sat nat zingri hkrum nga ai lam ni hpe shingdu gayin malap kau lu na gaw kadai rai ta? Kadai amyu sha .. kaning re nawku hpung masha ni mi rai rai mara kata sat hkrum ai hpe ja ja ninghkap nngai.

Myen (hpyen) Asuya amyu myu 1962 – 2014 ning du hkra matut manoi mungdan hpe zingri zingrat, gumshem ladat hte uphkang lu na matu sha n-ga Ethnic Rawt Malan Hpung ni hpe shagrawt gasat shamyit kau lu na matu Mung Masa, Hpyen masa ni hpe ndut ndang dingyang  garum nga ai lawu na mungdan mying jahpan ni hpe asan sha chye ngut ai hpang kahtap sawn sumru nhtawm tinang a amyu sha lawt lu lam de myit sawn dinglik chye ai hpawt ni na ningbaw ningla ni byin tai wa shajang na hpe kam let laika hpe ndai kaw hpungdim da nngai rai.

Myen Asuya hpe shaning (50) ning jan mung masa, hpyen masa ni hpe dingyang garum shingtau ai madung mungdan (6) ni gaw-
1.    China (Miwa Asuya)
2.    Israel
3.    North Korea
4.    Russia
5.    Ukraine
6.    Singapore


Yumaya Hpyen Magam Gun Dingsa

Wunpawng Amyu Sha Ni Hpyen Wa Hpe Mara Raw Tsaw ra Myit Madun Mayu Ai Nga Tim!

Wunpawng Mungdan de Mung Maden Myen Gumshen Hpyen ni hpya lu hpra sha, zingri zingrat hpyen n-gun la-ba hte gasat nga ai Mali ning hkran de rap mat wa sai. Wunpawng amyu sha ni a shingla majan hpe maram yu yang kaga Tain-yin-ta bawsang ni (Ethnic groups) a lapran hta gaw anhte wunpawng ni a kahkyin gumdin lam hte galaw sa wa ai bungli jasat jasa ni myi man kaji hkra nrai tim grai awng padang lu la sai ngu sawn la mai na kun?

Wunpawng amyu sha num ma ni hpe myen hpyen ni hkum shan roi rip hkrum ai law law hkrum sha ga ai, nkau gaw pi sat kau ai hkrum ga ai. Wunpawng amyu sha ni gaw tinang a amyu sha num ma ni hpe roi rip hkrum ai majaw matai dawk ai hku nna Myen num ni hpe rim nhtawm roi rip ai, sat kau ai ngu ai gaw na mung nna yu ai, nga mung n nga na re kam ai.

Kalang marang ngai hkrai myit yu ai, Myen ndai ni anhte Wunpawng amyu sha ni gaw hkristan makam masham nawku ai hte maren “Na a Shabyi maga mi bye ai wa hpe  maga mi naw ja ya u”(Luka 6:29) ngu sharin achyin hkam la sai hte maren, tinang hpe sat, nat je sha wa tim “Gwi gayet Shingna malap” ngu ai baw “mara raw” ya tik tik re akyang hpe chye ai majaw Myen ndai ni “Malat a U lahka” ngu ai baw wa mahkoi rai kun law? ngu ai de myit du wa ai hku rai nga ai.

Lai wa sai masum ya daram e Israel shabrang masum a moimang hpe mu tam ai nhkan e ndai manghkang hte la-kap nhtawm matai dawk ai hku nna hpa sawk sagawn dinglik ai lam ni shawng n galaw ai sha Palestinian ginra de lani mi na nhtoi jan hta Israel hpyen nbungli ni 43 lang bawm jahkrat sinat kaba ni hte gap di ram ram sat nat jahten kau ma ai.. hpang bai chye yang gaw Palestinian ma langai shawng sat hkrum ai majaw matai dawk ai hku nna Israel shabrang masum hpe rim sat ai zawn zawn nga shiga bai mawng wa ai.

Hpyen hpe mara hkrai raw … tsaw ra myit hkrai madun ai gaw mahtai kaja rai kun?

Lai wa sai March shata Myen gumsan Thein Sein Myitkyina lung wa ai shaloi Wunpawng amyu sha ni hku nna Wunpawng num ma ni, share shagan ni a “SAI” hkum ting hkyeng achya kap nga ai Thein Sein wa hpe Wunpawng Htunghking bu hpun palawng, Soi/ Gumhpraw Nhtu N-ga ni shagrau, tsaw dik ai madang hte hkap pang la ai lam ni gaw grai hkrak ai ngu sawn la ra na kun?

Ya ten du hkra Myen hpyen ni Wunpawng ginra kaw na nhkoi shi ma ai.
Ya du hkra Wunpawng amyu sha ni a sai, shan ni hpe naw lu sha nga ma ai.
Ya du hkra Wunpawng num ma ni hpe roi rip nga ma ai.
Ya du hkra Wunpawng Amyu sha yawng a Sali wunli ni hpe kashun Mya-lu Mya-sha nga ai.

Wunpawng Amyu sha ni a SAI, Hkrap Myi Prwi ni achya kap nga ai dai Myen Ningbaw ni(Than Shwe,Min Aung Hlaing, Thein Sein, Shwe Mahn hte Myen ningbaw ni yawng) shanhte kam nna Wunpawng ginra de du wa yang,   grai mara raw .. grai nan tsaw ra myit madun mayu ai nga yang mung 95% hkristan rai nga ga ai majaw CHOI PRA AI CHYUM LAIKA kumhpa jaw ai gaw lam ang nhten .. tsaw dik htunghking maka kumla ni hte sha gaw n shagrau n sha-a shi ga ngu ga saw lajin dat nngai law.


Yumaya Hpyen Magam-gun Dingsa
July 2, 2014

KBC : GUMSAN MAGAM U THEIN SEIN HTE HKRUM ZUP AI LAM

 

 

 

Jinghpaw ngu shamying lai wa sai Kachin ni

Jinghpaw ngu shamying lai wa sai Kachin ni

March 2, 2014

Kachin State ngu daidaw la lu wa na matu ..

Jinghpaw Dap ni, Jinghpaw Ranger Dap, Jinghpaw Levi dap ni grai shakut wa masai.

Dai Jinghpaw Dap ni hta Maru, Lashi, Azi, Rawang, Lisu, Hkahku, Duleng, Gauri, Sinli masha ni asak apnawng shakut shaja wa masai.

Dai aten, dai mung masa hpawa hta Jinghpaw ngu ai amyu sha byin pru wa sai hte maren Hpanwa Ningsang Chyewa Ningchyang hpe jaw jau bung ai amyu sha anhte ni yawng a lapran “Jinghpaw Ga” gaw shada matut mahkai kahkyin gumdin na matu kaja dik Karai Kasang kaw na shaman chyeju kumhpa lu la saka ai. Dai majaw Dr. Ola Han Son(1864-1927) gaw “Jinghpaw Laika” hpe Myen Hkawhkam ni pat hkum ai lapran e shalat nhtawm Chyum Laika(Bible) hpe mung shawng nnan Kachin yawng a matu Jinghpaw Laika hte dip galaw shapraw wa ai lam ni gaw .. grai loi la ai magam bungli nre zawn atang ahpa myit kau na lam mung shang nnga nhten.

Shadip Jahpang ahkaw ahkang nnga wa ai nhkan .. shing nrai tinang amyu hpe tinang nlu gaw sharawt la ai nhkan e daini na aten gadai mung kadai chye ai hku sawn dinglik galaw sa wa ai ten hta sadi maja let sung sung li li myit nhtawm kahkyin gumdin hte shawng de lahkam sa wa yang chyu sha anhte yawng myit mada ai Awmdawm ai Kachin Land ngu ai shingran de du wa mai na re.

Jinghpaw ngu ai gaw kadai ni rai ma ai ta? Gauri ni i? Gauri gaw Azi she re .. Zi Lahpai Nta ni she rai ma ai ..

Moi gaw Jinghpaw ngu jang Maru, Lashi, Azi, Rawang, Lisu, Hkahku, Duleng, Gauri, Sinli masha ni yawng hkyawm ai hku chye na lai wa saka ai.

Daini .. Jinghpaw Wunpawng ngu ai hpe nkam hkap la Jinghpaw ga hte Jinghpaw Laika mung ahkyak nrai mat .. Wunpawng ngu ai hpe pi yawng hkap la nkam .. shada shawngshai nga ai anhte Chyurum Hpunau ni wa .. Kachin Land a primary language hte Writing ngu ai hte la-kap nhtawm hpang e naw gasat hkat ra na ga ai kun?  India e nga ai saidaw saichyen ni gaw “Singhpaw”  ngu hkam la ma ai .. Miwa Gumsan Mungdan kaw nga ai Zi Zaiwa amyu malawng maga gaw “Jinghpaw Land” ngu myit rawt shamu shamawt wa nga ma ai.

Shinggyim mungkan a labau gaw hkring nga ai, mi na the maren sha “nan nan” rai nga ai lam nnga ai hpe mungkan masha yawng chye na hkap la ai, raitim labau ngu ai hpe malap mali shingdu gayin kau ai lam mung hkap la mai ai lam nrai nga ai .. Jinghpaw amyu ni ngu hkam la tawn ai kaw na, Jinghpaw Wunpawng Amyu sha ngu bai jai lang wa sai .. ya ten gaw Jinghpaw ngu ai hpe jahkrat nna “Wunpawng” ngu yang she main a re ngu bai garu gachyi hpang wa sai, myit yu na lam gaw kaning ngu mying-hkawt hpe lang na mi raitim jaw teng ai, pri manen ai hte yawng myit hkrum dawdan nhtawm hkan nang ghkan sa lu ai rai yang galu kaba rawt jat sa wa lu ai re majaw htaphtuk ai lam rai nga ai.

Minister Khin Yi ndau shana ai hku nga yang .. “Jinghpaw Wunpawng” ngu ai hpe nkam hkam la shajang ai anhte Maru, Lashi, Azi, Rawang, Lisu, Hkahku, Duleng, Gauri, Sinli, Manmaw, Htingnai masha ni  wa hpawt ni hpawt hpra Myen Asuya kaw na Yuptung Jahpan hta ngut ai hpang Myen Mungdan Masha yawng a ID kaw Amyu Sha ngu ai hta “Myanmar” ngu masat hkrum na lam hpe n-gup pat zim lazim sha nga na saka ai kun?


Yumaya Hpyen Magamgun Dingsa
 

(54) Lang na Shanglawt Rawt Malan Masat Ninghtoi - KIO Ginjaw Komiti Tingnyang Up a Rawt Malan N'htoi Mungga

2014-2-5 (Rot Mlan MG)

THE KACHIN (SHING NRAI) JINGHPAW WUNPAWNG

THE KACHIN (SHING NRAI) JINGHPAW WUNPAWNG \THE KACHIN

THE KACHIN

Self-determination, Federal Jet ai mung hpawm nlu dingsa Myen Asuya kaw na amyu shamat masing kaba ni hpe koi yen ga, Ninghkap ga..

Kachinland shing nrai Kachin Federated State ngu ai Bandung ndu ding sa Ngai Rawang nang Jinghpaw shi gaw Lawngwaw shanhte gaw Zaiwa ngu ai ga manawng, myit jasat yawng jahkring ga.

Kachinland shing nrai Kachin Federated State ngu byin wa ai shani e Jinghpaw WP amyu sha yawng kade rai nga ga ai ta? grau reng hkra grau hkum tsup hkra jawm gaw gap sa wa ga.

Ya gaw "KACHIN" ngu ai hkringhtawng hpe lang nhtawm Tai hpyen ni a hpawt-hpra na amyu shamat masing kaba hpe jawm ninghkap ga.

Ngai nan gaw Zaiwa dinggai(Mawshwi Nang Mun) a kashu re( Zaiwa25%, Hkahku+ Sinli 75%), ngai hkungran la tawn ai gainu jan mung Lawngwaw mying mying ai (Zaiwa 50% Lawngwaw 50% ) Maru tsawm shayi langai re.

Karai Kasang e shingteng tawn sai "KACHIN" ngu ai masha ni myit hkrum kahkyin gumdin let shakut shaja yang chyu sha Mayam prat na lawt mai na rai nga ga ai.

Daini na ten Kachin struggle hte sha gaw Myen Hpyen Dap Ningbaw ni Myen Mung masa rapdaw kaw na htingnut mat wa na matu tatut hta nloi ai majaw Laiza Conference a hpang All Ethnic political cooperation hte sa wa nga ai ten ngai Lisu nang Lawngwaw ngu ginhka chyai nga nna "hkye hkye rai ngam taw na" hpe dum let Kachin ngu ai hkringhtawng hta jawm shakut sa wa ga law.

Yumaya Hpyen Magamgun Dingsa
December 8, 2013

“EAOC” Zuphpawng hta shang lawm ai Hpunau Rawt Malan Dat Kasa Salang ni Laiza Muklum du.

“EAOC” Zuphpawng hta shang lawm ai Hpunau Rawt Malan Dat Kasa Salang ni Laiza Muklum du.

October 29, 2013
Written by KNET

KIO Ginjaw, Laiza Muklum kaw galaw na ETHNIC ARMED ORGANIZATIONS CONFERENCE Zuphpawng hta shang lawm na Hpunau Rawt Malan Dat Kasa Salang ni, Myitkyina-Laiza mawdaw lam hku nna 2013 ning October (29) ya shani hkying (12:00)Noon aten daram hta Laiza Muklum de du wa sai lam hpe chye lu ai.

 

Du wa ai Hpunau Rawt Malan Uhpung na Dat Kasa Salang ni hpe Laiza Muklum kata na Mungshawa ni lam lapai lahkra tsap let kabu gara hkap tau hkalum la nna KIO Ginjaw Komiti Salang ni kaw nna mung laksan shachyen shaga hkap tau hkalum la ai lamang galaw ai hpe chye lu ai.

 

Zuphpawng hta shang lawm na matu du shang wa ai Hpunanu Rawt Malan uhpung ni gaw, KNPP, NMSP, ALP, ANC, LDU, WNO, ARAKAN ARMY, PSLF/T.N.L.A, CNF, SSPP/SSA, DKBA, (DKBA.KLLT.Kayan Pyitit), KNU, NMSP, KNPP, PNLO, RCSS/SSA ni re hpe mung chye lu ai.

 

ETHNIC ARMED ORGANIZATIONS CONFERENCED hta shang lawm na Hpunau Rawt Malan Uhpung Dat Kasa Salang ni hpehkying (5:00)pm aten hta KIO Ginjaw Komiti Salang ni kaw nna hkaptau hkalum ai manhkrumshana lu sha hpawng galaw ailam hpe mung matut nna chye lu ai.

Ceasefire Accord hte Anhte a Mung Masa Shawnglam

Shawnglam Hpyen Magamgun ni

 

Daini na ten Tai Hpyen Myen Asuya kaw na shanhte pi lachyum atsawm nchye ai “အလံုးစံု အပစ္အခတ္ ၇ပ္ဆိုင္းေ၇း” ngu ai hpe October shata Naypyidaw e galaw na matu da-kring da-lang hkyen lajang nhtawm shara shagu hkan brawp hkawm nga masai.  Ethnic Rawt Malan Hpung ni hpe ga shakra kanawng yu yang, KIO kaw nna gaw Myen ga-si hku nna “အလံုးစံု အပစ္အခတ္ ၇ပ္ဆိုင္းေ၇း” ngu ai lachyum hpe atsawm nchye na ai ngu … bai ga-san san nhtang dat masai, UNFC malawm ni hte hkrum bawngban ngut ai hpang … mi “အလံုးစံု အပစ္အခတ္ ၇ပ္ဆိုင္းေ၇း”  ngu ai gasi hpe matut nlang ai sha “တျပည္လံုး အတိုင္းအတာ အပစ္အခတ္ ၇ပ္ဆိုင္းေ၇း/ Nationwide Ceasefire Accord) ngu ai gasi hpe bai lang hpang wa masai, Myen asuya kaw na majan hpe nlu shazim tim, International Community a man e  “Nationwide Ceasefire Accord” galaw lu na matu gaw ahkyak dik aten rai nga malu ai, rawt malan hpung yawng hte lama Ceasefire galaw lu wa ai ten UN Sec. General wa nan sa shanglawm shaman na ngu ga shakra tawn sai hte ASEAN Chairman hkap la woi zuphpang na lawnglam ndai lahkawng hte sha pi ndai Ceasefire Accord a lachyum/ manu gaw Tai myen hpyen ni a matu manu kaba dik rai nga sai.

 

Anhte Ethnic yawng a matu ndai Ceasefire Accord gaw lachyum pru ahkyak ai kun? teng sha simsa galu kaba nga yang .. kadai Manya majan hpe sharawng na rai ta? Myen ni a Maw Lanyet gaw, ya majan pi n-shazim tawn lu ai ten hta mungkan masha yawng a man Mandan gawut(black majic) ai zawn di dat nhtawm  Mungkan kaw na mung “Myen Asuya nnan kaw na galoi mung nlu/ nbyin yu ai labau shang  Ceasefire Accord kaba ndai hpe lu galaw masai .. dai majaw mungdan kaba ni kaw na yawng jawm shakawn jawm shagrau saka” ngu ai nhtoi byin hkra shakut nga ai aten rai nga ma ai .. ya na aten masa hpawa e Ethnic Rawt Malan yawng shang lawm ai Ceasefire Accord hpe October shata Naypyidaw kaw she galaw lu sayang gaw Myen Asuya kaw nna shanhte a Awng Padang Poi kaba hpe mungdan ting matut manoi woi galaw na matu  gaw nyak na sai.

 

1994 ning Myen hpyen jaubu chyawm tari ni shanglawm nna ta masat ka tawn ai myit hkrum ga sadi hpe pi sadi ndung, ya mung “tsun ai kaga .. galaw ai gaw kaga” dingyang naw galaw nga ai Myen hpyen ndai ni hpe tinang KIO/KIA Ginjaw kaw na loi loi hte kam, hkraw ya na masa nnga na nhten!! Ngu maram lu ai. Arakan Army, Taaung National Liberation Army(TNLA)/ KIO/KIA Amyu sha ginra ni hta majan shani shana, nsim nsa naw byin nga ai. Anhte tang hpyi ai mung masa ahkaw ahkang, amyu sha ahkaw ahkang ni hpe hkam dahka jaw lu ai roadmap shing nrai masing masa ni nmu lu  shi dingsa ga hpe pale palau,  kam ai hku tsun .. kam ai hku galaw  ai Myen Asuya tsun ai ga .. hkap la na lam nnga na nhten, grau nna Balawng hpu-nau Rawt Malan Hpung(Taaung National Liberation Army[TNLA]) hte tinang KIO/KIA gaw labau shang, 1964 ning Mung-be zuphpawng e lahkawng maga na ningbaw ni lawm rai,  prat dingsa amyu sha lawt lu lam hta rau ta gindun lahkrip ra ra gasat mat wa na ngu ai ga sadi ta masat hpe htu nhtawm hpu nau kumbang jun tawn ai lam ni gaw, gaman li la nrai nga  ai .. labau sakse ni mung rai nga sai.

 

Wunpawng Gumrawng Gumtsa Mungdan Bunghku hpe bai gaw sharawt lu na matu gaw nang, ngai yawng shani shana, nsim nsa naw da-hpran shakut lawm ra nga sai amyu sha/ mungdan bungli nan anhte yawng a man e ka-pa nga sai hpe dum ga.

 

 

Yumaya Hpyen Magamgun Dingsa

September 15, 2013

PUTAO, N-HKA GA (MU SAN) MARE MASHA NI HPE ZINGRI SHIGA

PUTAO, N-HKA GA (MU SAN) MARE MASHA NI HPE ZINGRI SHIGA

Nhtoi: September 8, 2013

Nhka Ga map

N-Hka ga mare kaw nga ai hpung up sara Sara Ram Mai hte shi kasha Ma Naw, Shd. Nang Mawn Htin Aung, Slg. Lahkreng Hkaw Dup hte rau marai 7 hpe rim let nhtang chyaw noi ta nna zingri nga ai lam na chye lu ai.  August 29 ya majan byin ai shani kaw na ya du hkra zingri nga ai lam na chye lu ai.

Mare na Num kasha ni hpe mung rim la nna nam de dun shang hkum shan roi rip (Rape) la nna labu palawng n kap ai bai dat dat, Mare masha yawng hpe mung KIA hpe madi shadaw ai ni re ngu yawng rim mahkawng la nna Nawku jawng kaw sharawng machyaw ta let zingri nga ai lam, September 7 ya shana maga Machyang Baw mare de hprawng lawt wa ai ni kaw na shiga lu la ai.

Myen hpyen ni gaw lawu ga na hpyen n-gun, Malu masha, laknak ni nbungli hte shani shagu htaw jat nga ding yang re lam chyelu ai. KIA Dap Ba 1, Dung 7 ginra hpe shata 3 laman zing madu la na masing nga ai lam kata lam shiga kaw na chye lu ai. Majan byin hpang ai shani kaw na ya ten du hkra N-hka mare hkan e Myen hpyen ni but jawng nga ma ai lam chye lu ai.

Ya majan byin nga ai ginra hta nga ai mare masha ni law malawng gaw Nung Lungmi amyu sha ni re lam matut chye lu ai.

Souce : PTO

UN Amu Madu Kaba A Laksan Dat Kasa Mr. Vijay Nambia Laiza De Sa Du

UN Amu Madu Kaba A Laksan Dat Kasa Mr. Vijay Nambia Laiza De Sa Du

August  29, 2013
Written by KNET

2013 ning August shata (28) ya shani (11:00)am aten UN Amumadu kaba a laksan datkasa Mr. Vijay Nambia, Mss. Marian, P.C.G ni hte K.I.O machyoi hpung rapdaw ni gaw KIO Ginjaw rai nga ai Laiza Muklum de sa du ai lam chye lu ai.

Laiza de sa du ai Mr Vijay Nambia hte Mss. Marian, PCG, KIO machyoi hpung rapdaw ni gaw KIO Ginjaw Komiti Salang ni hte hkrumzup da nna Je Yang hpyen yen dabang, Woichyai hpyen yen dabang ni hta sa du gawan da ai lam chye lu ai.

Dai hpang manhkrum lu sha hpe rau jawm sha nna, (3:30)pm aten hta Laiza kaw nna Myitkyina de bai nhtang wa sai lam hpe chye lu ai.

Hpawt-hpra Jinghpaw Wunpawng Amyu Sha ni a Mung Masa Gam Maka

Jinghpaw Wunpawng Amyu sha ni gaw  ginru ginsa labau hta galu kaba nga ai Amyu sha hte Mungdan hku nna nga grin hpawng-de sa wa lu na matu grak lagra shakut shaja wa yu ai labau sakse laili laika ni hpe tam sawk sagawn hkaja na matu nloi ai.

1947 ning du hkra Jinghpaw Wunpawng amyu sha ni a lapran e Mung Masa, Hpyen masa, machye machyang hpaji madang, sut masa hku nna Uhpung masum daram ga garan nga ai hpe dan dan dawng dawng mu chye hkaja lu ai.

Dai Uhpung masum gaw:

1.    Shaning tsa lam kahtap nna Myen Hkawhkam ni hte mahku mara htinglu htinglai nga lai wa ai Hukawng Magam Du ni hte aru arat ni.

2.    1890 ning hkan na English mung maden ni a lawu e hpyen magam gun shing nrai English/ American magam gun ai hte hpaji jawng lung hpang wa ai Sinli-Manmaw Jinghpaw Wunpawng Amyu sha ni.

3.    Kadai maigan amyu a ginjang ka-up nhkrum ai sha nga pra hkrat wa ai Hting-nai Jinghpaw Wunpawng Amyu sha ni rai nga ai.

Ndai Uhpung masum a lapran na ginru ginsa shingdu labau, Mung Masa, Sut Masa hte Hpaji machye machyang madang nbung hkat ai marang e 1948 – 1961 lapran Parliament Democracy mung masa kata Jinghpaw Amyu sha ni a mung masa, Sut Masa, hpaji masa ni hpe bawngring gan-ga madang sharawt lu ai madang atsang de n du wa lu ai sha kadai mung kadai chye ai hku shakut shaja wa ai hpe labau hta hkaja chye lu ai, ningmu kaja ni hpe jahkrup bawngban nhtawm tatut hkrang shapraw woi galaw sa wa lu ai lam nnga ai hpe hkaja chye lu ai, mi moi na bum langai hta Du langai up sha ai akyang lailen ni hpe mung nshamat nshayawm lu ma ai. Dai majaw 1949 ning Du Kaba Lahpai Zau Seng Rawt Malan hpang wa ai hp eaten kadun aloi sha Jinghpaw Wunpawng shada adup agrawp kau ya ai lam rai nga ai.

1962 ning kaw nna tinang mungdan ngu ai pandung hte rawt malan gasat wa ai hkrunlam hta  raitim uhpung kata ningbaw ningla shada nju ndawng, mung shawa hpe lam nchye woi, daru magam ahkang aya kashun hkat nna rawt malan labau ahkyeng amang byin lai wa yu sai. Myen hte simsa lam ngu ai ga hpaw dat shagu Uhpung kata “ga kaprang” wa ai chyu byin lai wa yu sai ..

Ya numdaw langai hta bai du nga saga ai, myit hkrum mangrum makai hkak, ta gindun let mungdan bungli hpe galaw sa wa ai nrai yang tinang a gam maka tinang hparan lu ai mungdaw mungdan ngu ai gaw shum tsun sa.. shingran na matu pi nmai na nhten.

Ya anhte du nga sai aprat ninggam gaw laiwa sai (10)ning hkan na masa hte pi nbung sai hpe hkaja chye lu ai.. kanu dapnu hpe woi awn nga ai hpu-awn nkau gaw tinang KIO/KIA hta grau dam lada tsaw ai Uhpung kaba ni hpe pi jum hpareng woi awn ai ningbaw ningla ni nga wa sai hte maren US, UK, Japan sha n-ga mungkan chyam hkra tinang kaw rawng ai atsam ni hpe sunglang woi awn na matu ahkaw ahkang kaba ni mung lu nga saga ai… ningbaw ningla kaja ni hpe shaprat nga ai aten ladaw rai nga ai the maren amyu sha ni hpe woi awn na, amyu sha mung masa hpe woi awn na matu respected leaders law law dan pru wa magang nga sai hpe mu chye lu nga saka ai. shingre respected leaders law law byin pru wa na matu ningbaw ningla magam bungli gun hpai nga sai ni hku nna Hpyen majan gasat ai lam, mung masa machye machyang hte mung shawa hte kanawn mazum(public relationship skill) hta ningtawn ra ai sha n-ga moral quality hpe mung chye na hkan sa ai ningbaw ningla ni hpawt-hpra a matu ra nga sai aten rai nga ai.. teng sha wa ram nan ram sai ngu ai ningbaw ningla langai hpe hkan shingdang hkum pat tawn lu na gaw kadai mung dangdi lu na nrai nga ai.

Amyu sha ningbaw ningla ngu sai hte maren Ja Nhkun langai, Hpun Lawk langai tinggyeng sut hpaga the mying jahten la ai lam hpe koi gam nhtawm  Amyu sha ting a hpaji lam(Statewide Education system), amyu sha sut hpaga lam, amyu sha Gaw-gap lam ngu ai, dam lada ai hku myit shajin tawn ra na rai nga ai, daigaw billion dollars investment ni re majaw grau kaba grau dam lada ai hku sa wa ra nga saga ai, anhte na anhte n-galaw chye yang ,,, maigan wa hpe sha kam ra na gaw lai nli re.

Jinghpaw Wunpawng amyu sha yawng a mung masa pandung de du na matu gaw maigan jasam wa dangdi lu ai nrai .. anhte yawng a myit hkrum kahkyin gumdin ai myit jasat gaw madung n-gun kaba rai na re .. Mung masa shawng de lahkam sa wa lu na matu ningpawt ninghpang hku nna KIO/KIA ningbaw ningla ni hta myithkrum n-gun rawng ra ai. daihpang Nawku hpung ni, Lawngwaw, Lashi, Azi, Rawang, Lisu, Jinghpaw amyu sha ningbaw ni mung masa hkrum bawngban zuphpawng galaw nhtawm Wunpawng Mungdan/ Kachinland a shawnglam gam maka hpe myit hkrum masing jahkrat nhtawm mung masa bungli ndai hpe rau jawm galaw sa wa ra ai. Dai hpang wunpawng mungdan/ Kachinland kata nga shanu ai Myen, Sam, Gorkha(nepali), Miwa the kaga bawsang ni a amyu sha ahkaw ahkang (mung masa ahkaw ahkang chyawm gaw kadai mung kade mungdan hta lu nga chyalu ahkaw ahkang rai na re) hte ngamu ngamai shimlam ni hpe jawm gaw sharawt sa wa ya lu ai shani she bawngring gan-ga simsa ngwi pyaw ai Kachinland/ Wunpawng mungdan ngu ai shingran hpe tatut hkam sha mu lu na re ngu ai labau hta sharin la ai ningmu hte sawn lu ai lam ni hpe tang madun dat nngai rai.


Yu Maya Hpyen Magam Gun Dingsa
August 18, 2013

2013 Share Shagan Ninghtoi Masat KIO Tingnyang Up kaw na Mungga

Share Shagan MS Nht MG by Tu Lum Marip

KIO Ginajaw Dat Kasa Hpung Ni, Myen Asuya Dat Kasa Hpung Ni Hte Hkrum Bawngban Na Matu Myitkyina Muklum De Du

KIO Ginajaw Dat Kasa Hpung Ni, Myen Asuya Dat Kasa Hpung Ni Hte Hkrum Bawngban Na Matu Myitkyina Muklum De Du

Written by KNET
May 27, 2013

2013 May (27) ya shani KIO Ginjaw Hpaji Dap Lithkam Sara Kaba Sumlut Gam woi awn ai KIO Datkasa hpung ni gaw Myen Asuya Dat Kasa Hpung ni hte Myitkyina Muklum kaw hkrum bawngban na matu Laiza Muklum, Padang Gawnknu kaw jahpawt hkying (7:00)am aten hta kanu kawa hpung woi sara ni kaw nna ahkyu hpyi shaman ya ai hpang hkying (8:00)am kaw nna Myitkyina Muklum de Namsan Yang lam hku nna pru hkawm wa ai lam hpe chye lu ai.

 

Jahpawt hkying (9:30) am aten ram hta Namsan Yang kaw sa tau ai PCG Salang, UN Salang hte Myen Asuya maga na salang ni hte hkrum nna Myitkyina Muklum de rau matut hkawm sa wa ai lam hpe chye lu ai.

 

Shani hkying (11:30)am aten ram hta Awng Mae Tit mare kaw nna Myitkyina Muklum, Shatapru Manau wang du hkra buga de na mung shawa masha (20,000) ram gaw mawdaw lam, la-pai la-hkra tsap nna KIO dawnghkawn, amyu sha dawnghkawn hte KIO Datkasa hpung ni hpe kabu gara hte hkap tau hkalum la ai lam hpe chye lu ai.

 

Myitkyina Manau wang hta shani hkying (1:00)pm aten ram kaw du shang wa nna shani malu masha sha ngut ai hpang hkying (1:30)pm aten ram hta KIO Dat Kasa Rung dingsa kaw PCG Salang ni hte MCC na kanu kawa myitsu salang ni hte hkrum nna ahkyu hpyi shaman la ai lam hpe chye lu ai.

 

KIO dat kasa hpung hte Myen Asuya dat kasa hpung ni gaw 2013 May (28) ya shani kaw nna hkrum bangban na re lam hpe chye lu ai

PANG LUNG GA SHAKA LAIKA BYIN WA AI LAM

PANG LUNG GA SHAKA LAIKA BYIN WA AI LAM

Wabaw Zau Rip

1947 ning, February shata 12 ya shani, Sam Mung, Pang Lung mare, e bumga masha rai nga ai, Sam, Hkang. Jinglipaw hte Myen ni. myit mang hkrum nna. Pang Lung Ga Shaka hpe letmat jawm htu ma ai. Din ga shaka laika gaw, Mung Hpawm Myen Mimg byin wa ai ningpawt ninghpang rai nga ai.

 

MUNGKAN MAJAN HPANG MYEN MUNG A UP HKANG LAM.

 

1945 ning, mungkan majan ngut ai hpang, Inglik Asuya ni. Myen mung hpe bai up hkang na matu lajang sa wa ai shaloi majan aten India mung e hpyen hprawng nga ai, Myen Mung ( Governor) Mung up du, Sir Reginald Doi-man-Smith ningbaw ai Myen mung Atsuya gaw, lawn Myen mung hpe (Dominion Status) ngu ai madu up ahkang aya Jaw nna ngam nga ai, bumga masha. Sam, Hkang, Jinghpaw hte Karenni ( Kayah) amyu ni hpe gaw, garai nkung n hpan nchye n chyang ai amyu ni re majaw, Myen ni hte n gayau ai sha, shanhte Inglik ni a n-pu e. ( Frontier Areas Administration ) ngu ai bumga masha ni hpe san san up hkang ai lailen amyu mi hku, moi majan garai n byin yang na (Divide and Rule Policy ), amyu langai hte langai hpe garan up hkang ai lailen hte, naw up hkang na matu yaw shada maw mawn sa wa ma ai.

 

Dai aten hta lawu Myen mung e, Bogyoke Aung San woi awn ai, Hp.S.P.L. Hpung ni gaw Myen mung ting shanglawt lu hkra galaw na. Inglik ni Myen mung hpe shanglawt n jaw yang, gasat nna rai tim la na ngu daw dan shatawng shada sai hte maren mung masha ni yawng, mung masa lam hta myit rawt let shamu shamawt hpang wa nga ai aten rai nga ai.

 

Shing rai nga ai aten hta, anhte Jinghpaw Wunpawng sha ni hta mung, Sama Duwa Sinwa Nawng woi awn ai, ( Mung Masha Kunghpan Hpung ) hte Wabaw Zau Rip woi awn ai (Pawng Yawng Ram Rawt Hpung) ningbaw ningla ni hte mung masha ni gaw Inglik a mayam prat na lawt lu hkra galaw ra sai, shanglawt lu hkra shakut ra sai nga nna, mung masa lam ni myit hprang myit rawt, shamu shamawt hpang wa ai aten rai nga ai.

 

Sama Duwa gaw. "anhte Jinghpaw ni. Inglik a mayam prat na lawt hkra shakut ra sai. shanglawt la nna, Jinghpaw mung garan la ga."' nga, shani shana n yup n sha. hkrum mu ai Jinghpaw kanawn manang shagu hpe mung masa gamung hkaw tsun tik tik rai nga ai, kalang lang, lata machyi pi n dum hkra, lamu ga lahtum nna, n-gun mi alu hkaw garu jahtau marawn myit sharawt ya nga ai rai.

 

BOGYOKE AUNG SAN HTE JINGHPAW DU SLANG N1 HKRUM AI LAM.

 

Jinghpaw Wunpawng sha ni mung masa lam hta myit hprang myit rawt nga ai aten hta. Hp.S.P.L.Hpung ningbaw Bogyoke Aung San gaw Myen mung Inglik Governor wa a Mung Bawng Ginjaw na mung makawp maga dap hte seng ai, hkring mang salang kaba (Wungyi ) rai nna hpyen dap ni hpe gawan hkawm let, Myitkyina mare de, 1946 ning November shata 28 ya shani du ai. Bogyoke Aung San Myitkyina de du ai shaloi, Jinghpaw du salang ni hte hkrum shaga mayu ai lam tau nna shana taw n sai hte maren, Myitkyina hte Manmaw sinwang shara shagu na Jinghpaw du ni, Myitkyina mare e, ram ram law hkra du hkum nga ma ai.

 

29.11.47 ya shana hkying 7 hta, Jinghpaw hpyen dap No.2 ( 2nd. Kachin Rifles ) G.C.O mesaa ngu ai, hpyen du ni a ban sa shara e, Jinghpaw du salang marai 30 daram hte Bogyoke Aung San zup hpawng hpawng ma ai. dai zuphpawng hta Bogyoke Aung San gaw. shi Myitkyina de du ai lam gaw, Jinghpaw salang ni hte hkrum shaga myit mang hkrum lam tam na matu du lung wa ai re nga nna ga hpaw hpang ai. " Ya mungkan majan ngut ai hpang, Inglik ni Myen mung hpe, moi na zawn, prat madang n dep mat ,sai. anhte Myen mung masha amyu langai hte langai hpe garan nna up hkang ai lailen hte bai uphkang na, hkyen nga ai lam, shi woi awn ai Hp.S.P.L. Hpung a yaw shada ai lam gaw, Myen mung ting awm dawm shanglawt ahkang aya lu hkra ngu, yaw shada daw dan tawn sai re majaw, anhte Myen mung e nga ai amyu ni yawng myit mang hkrum, kahkyin gumdin let, shang lawt lu hkra galaw ga ngu, nanhte Jinghpaw du salang ni hte, bawng jahkrum na matu du ai re nga nna tsun ai.

 

Anhte Myen ni hpe Dominion Status ngu ai, shanhte Ingalik ni a shang wang kata madu up hkang aya Jaw nna, nanhte bumga masha rai nga ai Sam, Hkang, Jinghpaw, Kayin, Kayah ni hpe gaw, shanhte naw up hkang na nga yang anhte ra sharawng ai mung ting shang lawt lu hkra galaw na ngu ai yaw shada ai lam garai n byin na re, dai majaw anhte Myen ni hte myit mang hkrum nna shang lawt la ga. Ingalik a mayam prat na lawan lawt yang sha anhte a galu kaba nga mai lam amu magam ni hpe anhte nan lajang hparan la lu na re nga nna tsun htai dan ai. " Ingalik ni lama anhte Myen mung hpe. shang lawt njaw na nga yang anhte Myen ni gaw gasat nna raitim la najinjin rai nga ai'' nga tsun ai.

 

Dai shana Bogyoke Aung San hte sa hpawng lawm ai Jinghpaw du salang ni yawng a malai, Sama Duwa Sinwa Nawng gaw, "Dai na nang Bogyoke hte n myit mada ai hkrum shaga lu ai majaw anhte yawng grai kabu chyeju dum ga ai. Nang tsun lai wa ai mung masa mung ga ni hpe madat la lu ai majaw anhte ram ram myit hprang mat saga ai. anhte Jinghpaw ni Ingalik a mayam tai ai 50 ning jan laman hta, anhte a nga sa madang lam shagu hpang hkrat mat sai lam chye lu ai, laika hpaji hta grau hpang hkrat mat sai, ya mung anhte hpe ma yam naw yam na nga yang anhte n hkam lu sai anhte Jinghpaw ni mung shang lawt lu hkra galaw shakut hpang wa na sha rai sai" ngu bai htan shana tsun wu ai. Dai shana Bogyoke Aung San hte hkrum ai Jinghpaw du salang ni gaw shi hkaw tsun dan ai "Mung Masa" mung ga ni hpe madat la ngut ai hpang, ram ram wa myit hprang myit rawt shajang ma ai.

 

JINGHPAW DU SALANG NI HTE MR. STEVENSON HKRUM AI LAM

 

Ingalik Asuya ni mung shanhte yaw shada tawn ai hte maren, bumga masha ni hpe san san up hkang na dap hpaw tawn magang sai. Shanhte yaw shada ai 1am hta Jinghpaw ni mung myit hkrum lawm hkra Jinghpaw du salang ni hte bawng jahkrum na matu bumga masha ni hpe up hkang dap ginjaw du kaba, ( Director of Frontier Areas Administration ) Mr. H.H.C. Stevenson, Myitkyina de du ai shaloi Jinghpaw du salang ni hpe shaga hpawng nna " Ya nanhte Jinghpaw ni anhte Ingalik ni a up hkang ai n-pu e naw nga mu 5 ning laman hta nanhte Jinghpaw ni hpe Myen ni hte maren kung hpan chye chyang wa hkra lajang ya na nanhte ra ai Jinghpaw mung hpe garan ya na matu jin jin rai sai." nga nna shalen asawng ai ga tsun ai.

 

Dai shaloi ngai gaw, "Nanhte Inglik ni anhte Jinghpaw ni hpe mayam yam mat wa ai 50 ning laman hta, anhte a matu laika sharin jawng langai mi pyi n hpaw ya ai majaw anhte dai ni Hkang amyu ni daram laika hpaji n chye mat ai mu lu ga ai 5 ning laman hta byin hkra galaw ya na nga ai ga gaw, hpa kam shara nga a ta ? bai nanhte Inglik ni garan ya na nga ai Jinghpaw mung gaw pa layang n lawm ai bum lagaw a lahta de sha garan ya na lajang tawn ai lam chye lu ga ai, anhte galaw sha na dam lada ai pa layang n lawm ai Jinghpaw mung anhte n hkap la lu ga ai" ngu tsun ai shaloi, Stevenson ram ram mau ai hte kaya hkrum nna ga n chye htan mat ai.

 

Inglik Atsuya ni arawng aya jaw nna shagrau sha-a tawn ai Jinghpaw du salang n kau mi hte Atsuya mu gun hpai nga ai Jinghpaw salang n kau mi chyawm gaw Inglik a n-pu e naw nga yang she grau kaja na re nga tsun ai hta n-ga, Inglik ni maga de lawm na matu mung masha ni hpe hkaw tsun shakut lawm ma ai. Hpa majaw nga yang, Inglik Atsuya hkoi mat wa yang shanhte a arawng aya ni sum mat na tsang nna rai nga ai. Dingla shabrai ( Pension ) sha ai Jinghpaw du n kau mi gaw, Inglik ni wa mat jang anhte hpe shabrai kadai jaw na rai ta ? nga hkrit tsang ma ai. Shanglawt lu yang kade daram grau kaja ai akyu hkam sha lu na karai n mu n chye ai ni rai ma ai. Kunghpan Hpung hte Pawng Yawng Ram Rawt Hpung ningbaw ni gaw Bogyoke Aung San hte hkrum ngut ai hpang, Myen ni hte rau shang lawt la nna Jinghpaw mung garan la na matu bawng daw dan tawn sai rai.

 

JINGHPAW KASA SALANG NI PANG LUNG ZUP HPAWNG DE SA AI LAM.

 

1947 ning January shata laman Myitkyina ayebeng wa gaw laika ka ai wa hpe Sam mung Pang Lung mare e. 5.2.47 ya shani bumga masha ni a Zuphpawng hpang na re ai majaw dai zuphpawng de sa lawm na Jinghpaw kasa salang ni hpe lata la na matu shana ai. Shing rai 29-1-47 ya shani ginwang shagu na mung du salang ni, Myitkyina mare e sa du hkum nna, Jinghpaw Hpaga Hpung ni a mawdaw gram lajang ai. ginsum nta e hpawng nna Pang Lung zuphpawng de sa lawm na kasa salang marai 8 hpe lata san dat ma ai. Dai kasa salang gaw lawu de ming rawng ai ni rai ma ai.

 

1. Sama Duwa Sinwa Nawng. (ningbaw) Kamaing Ginwang.

2. Wabaw Zau Rip. ( Amu madu ) Myitkyina

3. Salang Dingra Tang. ( Kasa Salang) Putao

4. Duwa Htingnan Gumja ( Sumpra Bum )

5. Duwa Karing Naw. ( Sumpra Bum )

6. Chying Htawng Duwa Zau Naw ( Sadung )

7. Duwa Nding Tawng U. (Hugawng )

8. Sara Chang Zung . ( Lau Hkawng )

 

Hpang shani Pang Lung zuphpawng de rawt sa wa na re ai majaw dai shana. Jinghpaw Hpaga Hpung Rung gawk e, lahta de mying rawng ai kasa salang ni hte kaga Kung Hpan Hpung hte Pawng Yawng Ram Rawt Hpung ningbaw ningla ni Pang Lung zuphpawng hta sa shawn na lawu de na mungga ni hpe bawng daw dan ka lajang sa wa ma ai.

 

BAWNG DAW DAN AI MUNGGA NI.

 

1. Myen ni hte rau shang lawt la na.

2. Shanglawt lu ngut ai hpang. Jinghpaw ni law malawng ra sharawng ai hte maren, Jinghpaw mung hpe garan dai daw la na.

3. Dai Jinghpaw mung gaw. Myitkyina hte Bhamo district ( ginwang 2) lawm ai rai ra ai.

4. Myen ni hte Jinghpaw ni myit hkrum ai hte Jinghpaw mung a lamu ga jarit masat la na.

5. Jinghpaw ni lu ang ai ahkang aya ni lu la hkra, Jinghpaw ni a up hkang aya ni hpe Bumga masha ni hpe Up Hkang Dap na htawt ap la na, dai hpang, shanglawt garai n lu ai laman gan hpaw ai Myen mung Atsuya hta Jinghpaw hkring mang salang ( Wungyi) langai shalawm ya na;-

(a) Dai Jinghpaw wungyi wa gaw byin wa na Jinghpaw mung a up hkang lam hpe lit la na.

(b) Myen mung Atsuya ni a maigan mung dan ni hte matut mahkai ai bawng ban lam hta bawng ban lawm lu na.

(c) Jinghpaw salang langai mi hpe, Myen mung a makawp maga dap wungyi wa hpe hpaji jaw na matu san tawn ya na.

 

6. Jinghpaw ni hte Sam ni Mung Hpawm Myen Mung a Up hkang ai Upadi Hkrang ka lajang na Rapdaw hta shang lawm na.

7.Lahta de tsun lai wa sai hte maren, shanglawt lu ngut ai hpang Jinghpaw mung lawm ai mung hpawm Myen mung Atsuya hpe gaw dai daw na.

8. Munghpawm Myen Mung Atsuya kaw na Jinghpaw mung a galu kaba nga mai amu magam ni galaw lajang sa wa ai lam ni hta jai lang na gumhpraw garum ya na.
9. Lahta de ka madun mat wa ai Jinghpaw ni daw dan ai mung ga ni hpe kaga bumga masha ni yawng myit hkrum lawm hkra yaw shada ai.

 

Pang Lung zuphpawng hta sa shawn na lahta de na dawdan ai mungga ni hpe Amu Madu wa Myen laika hku ka lajang htang dip ngut ai hpang kasa salang marai 8 myit hkrum letmat htu ma ai. Lahta de ka madun tawn ai Jinghpaw Du salang ni daw dan ka lajang letmat htu tawn ai laika hpe, frontier Areas Committee Of Enquiry Report, Part II laika man 173 hta mu hti na re.

 

30-1-47 ya shani Jinghpaw kasa salang ni Pang Lung mare de rawt sa wa ma ai. Dai shana Manmaw mare de du ma ai shaloi. Manmaw Ginwang na Pang Lung zuphpawng de sa lawm na Jinghpaw salang (1) Duwa Zau Lawn (2) Lawdan Duwa Zau La (3) Sara Maran La (4) Salang Labang Grawng ni gaw dai shani sa wa magang sai lam chye na lu ai. Hpang shani Mamaw mare kaw na bai rawt sa wa yang Sam Mung Sinli Du wa a n-ta e, Manmaw kasa salang ni hte hkrum ga ai.

 

1.2.47 ya jahpawt, Sinli Duwa a n-ta e, Myitkyina hte Manmaw kasa salang ni zuphpawng e sa shawn na matu, Myitkyina kasa salang ni bawng daw dan ka lajang sa ai mungga laika hpe shaw madun hti dan htai dan ngut ai hpang '' Ndai anhte Myitkyina kasa salang ni bawng daw dan sa ai mungga ni hpe nanhte Manmaw kasa salang ni hte bawng jahkrum ngut jang she Pang Lung zuphpawng de matut sa wa na hku re hpa majaw nga yang, lahta de daw dan sa ai mungga ni hpe Pang Lung zuphpawng hta anhte Jinghpaw ni yawng myit hkrum daw dan sa ai mungga re ngu tang shawn na hku re" ngu tsun dan ai. Dai lam hpe Myitkyina hte Manmaw kasa salang ni ram ram aten la nna bawng ban ning dang hkat nna, Manmaw salang ni myit hkrum let dai daw dan laika hta letmat htu lawm ma ai. (Dai Pang Lung zuphpawng hta sa shawn na daw dan ai mungga laika hta Myitkyina hte Manmaw kasa salang marai shi lahkawng (12) 1 -2-47 ya jahpawt myit hkrum daw dan letmat jawm htu da ai hte seng nna, ( Frontier Areas Committee Of Enaquiry Report, Part II, laika man 174 mu hti lu na re.)

 

Myitkyina hte Manmaw kasa salang ni myit hkrum letmat htu ngut ai hpang Sinli mare kaw na Pang Lung mare de rau rawt sa wa ga ai. Pang Lung mare de 4-2-47 ya shani du ga ai. Dai shana de hkying 4 hta Nyaung Shwe Saw Bwa Saw Shwe Thaike ( Shanglawt Mung Hpawm Myen mung a shawng nnan Gumsan Magam ( Thamada) tai lai wa sai,) woi awn ai kaga Sam Du 5 hte shawng hkrum shaga ga ai.

 

Sam Sawbwa ni Jinghpaw du salang ni hpe hkap hkalum shachyen ngut ai hpang shanhte Sam du ni myit hkrum daw dan ka lajang tawn ai mungga laika hpe madun nna shanhte yaw shada tawn ai lam tsun htai dan ma ai. Sam du ni a daw dan tawn ai laika gaw Inglik hku ka tawn nna, Jinghpaw kasa salang ni hpe byan dan na matu aten naw la ra ai majaw zuphpawng jahkring tawn saga ai.

 

Sam Sawbwa ni daw dan tawn ai lam gaw, Myen ni hte n kanawn ai sha, Inglik ni ra sharawng ai hku, bumga masha ni hpe san san up hkang ai n-pu e naw nga na ngu ai rai malu ai. 5-2-47 ya jahpawt hkying 9 hta zuphpawng mandat e, Sam du ni hte Jinghpaw kasa salang ni bai hpawng ai shaloi, Jinghpaw kasa ni a malai, Sama Duwa Sinwa Nawng gaw, Jinghpaw kasa salang ni myit hkrum daw dan sa ai, mungga laika hta na, (1) Myen ni hte rau shang lawt la na. (2) shanglawt lu ai hpang, Sam mung Jinghpaw mung garan masat la na, tinang mung tinang up hkang na.(3) Sam mung hte Jinghpaw mung lawm ai Mung Hpawm Myen Mung dai daw masat na ngu ai lam masum hpe Sam du ni myit hprang, chye na hkra tsun sang lang dan wu ai. Dai shaloi Sam du nkau mi, Jinghpaw ni daw dan sa ai mungga laika ni hpe chye na, ra sharawng wa ma ai. Anhte kadai mung Myen ni a n-pu e ntaw ai, maren rap ra ai, democracy ahkang aya hte maren. tinang a mung tinang up hkang nna, tinang a amyu hpe galu kaba nga mai wa hkra galaw lajang la lu na lam ni hpe galu galang tsun sang lang dan sai. Dai hpang Sam du ni shanhte shada naw bai bawng yu na nga nna, zuphpawng hpe hpang shani bai hpawng na hku bai htawt kau masai.

 

Dai aten hta, Sam mung e, Sam Mung Masha Shanglawt Hpung hpe Sam mung na, hpaji chye ai Ram ma ni hpaw hpang tawn nna, Sam mung masha ni, shanglawt lu hkra galaw na nga yaw shada let, mung masa shamu shamawt hpang wa nga ma ai. Dai hpung ningbaw ningla ni mung Pang Lung zuphpawng hta sa lawm na matu Pang Lung mare e du nga shajang ma ai. Jinghpaw kasa salang ni du nga ai lam chye ai hte maren, Jinghpaw salang ni a jasat sa ai lam ni hpe chye mayu ai majaw sa jahkrum shachyen shaga san sagawn ma ai. Jinghpaw salang ni Pang Lung zuphpawng e shawn na ngu daw dan sa ai mung ga lam (9) hpe tsun shana dan ai shaloi, Shanhte Sam Mung Masha Shanglawt Hpung ni myit jasat yaw shada tawn ai hte maren re ai majaw hkap tau hkap la myit hkrum mai ai lam tsun shana ma ai. Raitim, Sam du ni hte naw bawng jahkrum na re nga tsun ma ai.

 

6-2-47 ya shani. zuphpawng, bai hpang yang Sam Sawbwa ni Sam Mung Masha Shang Lawt Hpung ningbaw ningla ni hte Jinghpaw kasa salang ni zuphpawng galaw nna lawu de ka madun ai mungga laika ni hpe, myit hkrum daw dan ka lajang letmat htu da saga ai.

 

1. Myen ni hte rau shang lawt la na.

2. Myen Mung Atsuya hpung hta; Jinghpaw hte Sam salang langai hpra shang lawm nna, dai salang yan gaw tinang a mungdaw a up hkang ai lit ni la na hte, Myen mung Atsuya maigan mungdan ni hie malut ai lam mungdan makawp maga ai lam ni hta lit jawm la na.

3. Jinghpaw kasu salang ni hpyi shawn ai Jinghpaw mung masat ya na lam hpe myit hkrum tau lawm ai.

4. Shanglawt lu ai hpang, Jinghpaw hte Sam ni, Mung Hpawm Myen mung na garan pru mayu yang pru na ahkang aya jaw na. lahta de na myit hkrum daw dan ai mungga ni hpe Sam Sawbwa marai (5) Sam Mung a Shanglawt Hpung ningbaw marai (7) Myitkyina Jinghpaw kasa salang marai (3) hte Manmaw kasa salang marai (3) myit hkrum letmat htu da sai.

 

6-2-47 ya shana de, Hkang dat kasa salang ni Pang Lung zuphpawng lawm na matu du sa ma ai. Dai shana Hkang salang ni hpe Jinghpaw hte Sam ni bawng daw dan da ai lam ni tsun shana sanglang dan ai shaloi nanhte Sam hte Jinghpaw du salang ni myit hkrum tawn sai lam ni hpe anhte Hkang ni hpa myit n hkrum shara nga ai nga bai htan shana ma ai.

 

7-2-47 ya jahpawt hkying 9 hta Sam Hkang hte Jinghpaw salang ni kalang mi bai hpawng nna Sam hte Jinghpaw ni myit hkrum daw dan tawn ai mungga ni hpe Hkang dat kasa salang ni mtyit hkrum lawm sai nga ai majaw, lahta de ka madun lai wa sai daw dan laika hta Sam, Jinghpaw hte Hkang salang ni letmat jawm htu masai.

 

Lahta de tsun lai wa sai hte maren Sam, Hkang hte Jinghpaw ni Myen ni hte rau shanglawt la na ngu daw dan ai lam hpe, Inglik Atsuya ni chye ai shaloi ram ram kajawng ai hte manu ma ai. Raitimung Mr. Stevenson hte shi a lawu na Inglik hte Jinghpaw du n kau mi chyawm gaw bumga masha ni shanhte yaw shada ai maga de mahkoi bai gayin wa na kun nga nna lam amyu myu hku hkan asawng shanut lawm ma ai. Pang Lung zuphpawng ngut ai aten du hkra shakut kau ma ai.

 

8-2-47 ya shani, Bogyuke Aung San hte shi a Atsuya hta lawm ai Wungyi U Tin Htut. Sir M.A. Maung Gyi- Hp.S.P.L. Hpung ginjaw salang U Pe Khin hte Bo Khin Maung Galay ni, Pang Lung zuphpawng lawm na matu du sa ma ai. Dai aten hta Bogyokb Aung San hpe Inglik Atsuya ni Myen Mung a Wungyi Choke aya jaw tawn masai.

 

9.2.47 ya shani hkying 11 hta zuphpawng man dat e, Bogyoke Aung San hte Myen hkring mang salang ni hte Jinghpaw, Sam hte Hkang dat kasa salang ni zuphpawng hpang wa sai Zuphpawng hpang ai hte maren Bogyoke Aung San shawng nnan mungga tsun ai gaw. " Dai ni ngai ndai Pang Lung zuphpawng de sa du lawm ai gaw Mungga lam lahkawng tsun shana mayu ai majaw re. (1) Anhte Myen mung e nga ai mung masha ni yawng myit mang hkrum kahkyin gumdin lu hkra galaw shakut na. (2) Ngai, England mung de sa du nna Myen mung a shanglawt lu na lam Inglik Atsuya hte bawng ai shaloi bumga masha ni a lam hte seng nna bawng ban ai lam ni nanhte du salang ni hpe htawn shana mayu ai lam ni rai nga ai.

 

Ya anhte Myen Mung shanglawt lu na sha rai sai. Dai majaw anhte Myen ni shanglawt lu ai hte maren bumga masha ni mung shanglawt lu ra ai. Bumga masha ni hte Inglik ni mayam naw yam nga na anhte myit n hkrum ga ai. Dai hte maren, bumga masha ni hpe Myen ni mayam n byin shangun mayu ai. Bumga masha ni shanhte ra sharawng ai hku shanhte uphkang lu na re ngu, Inglik Atsuya hpe tsun shana sai.

 

Myen ni Inglik a mayam n kam tai sai hte maren, bumga masha Inglik a mayam naw tai nga na hpe anhte n ra ga ai " nga galu galang hkaw tsun dan wu ai. Dai ni bumga masha ni myit mang hkrum ai hte " Myen ni shanglawt lu ai hte maren Shanglawt lu mayu ga ai” ngu tsun yang hpawt ni shang lawt lu na re, kadai hpe n hkrit nga ra sai" nga n-gun mi alu hkaw tsun ai shaloi shawa masha ni grai kabu la hpawk dum ma ai." Inglik ni gaw Myen mung e naw nga na ahkang aya n nga sai kade nna yang hkoi wa sana re ai. Dai majaw tinang a hkum tinang kam ra sai. grau nna anhte mung masha shada myit mang hkrum na ahkyak kaba rai nga ai."

 

Dai hpang Myen ni hte bumga masha ni kaning rai kanawn mazum na yaw shada ka lajang sa al laika ni garan jaw nna lahkawng maga ra sharawng ai lam ni tsun bawng sai. Shingrai hpang shani bai bawng matut na matu committee salang ni lata ngut ai hpang zuphpawng hpe dawm kau sai.

 

10-2-47 hte 11-2-47 ya, lahkawng ya tup shani shana bogyoke Aung San hte bumga masha ni n hkring n sa bawng lahkrum ga ai. Sam mung hte Hkang mung masat ya na matu loi ai daram Jinghpaw mung masat ya na ngu ai lam bawng ai hta aten ram ram na mat wa ai. Hpa majaw nga yang Sam ni Sam hkrai san rai nga ai, Hkang ni Hkang ni hkrai san rai nga ai. rai timung Jinghpaw ni hpyi ai Jinghpaw mung gaw Myitkyina hte Manmaw ginwang bum pa layang yawng Myen hte Sam ni nga shajang ai pa layang yawng hte hpe shalawm ya na matu hpyi ai re majaw Myen hte sam ni gaw Jinghpw mung kata e nga na myit hkrum n hkrum hpe garai n chye lu ai majaw yak ai lam pru na re nga tsang ya ai hku re. hpang jahtum Bogyoke Aung San gaw Jinghpaw ni ra sharawng ai hku hkan ya nna Pang Lung Ga Sadi laika hpe lahkawng maga myit hkrum daw dan da sai rai.

 

Dai Pang Lung Ga Sadi laika hpe 1947 ning Febuary shata 12 yajahpawt lawu de mying rawng ai ni letmat htu nna shagrin da saga ai rai.

1. Bogyoke Aung San (Myen Mung Atsuya malai)
2. Sao Hkun Pan Saing ( Tawng Peng Saw Bwa)
3. Sao Shwe thaike (Ngyawng Shwe Saw Bwa)
4. Sao Hone Hpa ( Sinli Saw Bwa)
5. Sao Nun (Laika Saw Bwa)
6. Sao Sam Htun (Mung Pawng Saw Bwa)
7. Sao Htun Aye (Sam Hkang Saw Bwa)
8. Duwa Hkun Hpung (Sinli Dat Kasa Salang)
9. U Tin Aye (Tawng Gyi Dat Kasa Salang)
10. U Kya Bu (Thi Baw Dat Kasa Salang)
11. Sao Yit Hpa (Thi Baw Dat Kasa Salang)
12. U Hkun Hti. (Pang Lung Dat Kasa Salang)
13. U Tun Myint. (Mawk Mai Dat Kasa Salang)
14. U Hkun Saw. (Pindaya Dat Kasa Salang)
15. U Hpyu (Si Sai Saw Bwa a malai)
16. Sama Duwa Sinwa Nawng (Jinghpaw Kasa Salang)
17. Duw a Zau Rip. (Jinghpaw Kasa Salang)
18. Salang Dingra Tang. (Jinghpaw Kasa Salang)
19. Duwa Zau Lawn. (Jinghpaw Kasa Salang)
20. Salang Labang Grawng (Jinghpaw Kasa Salang)
21. U Hliu Hmug (Hkang Kasa Salang)
22. U Thaung Zahkap (Hkang Kasa Salang)
23. U Kio Mang (Hkang Kasa Salang)

 

Pang Lung Ga Sadi Laika hpe letmat htu ngut ai hpang Pang Lung mare e. Myen ni hte bumga masha Sam, Hkang hte Jinghpaw ni shawng nnan myit mang hkrum ai shara re ngu masat dingsat nlung shadaw jung tawn da na matu. U Tin Aye mungga shawn nna U Kya Bu tau ya ai hte myit hkrum daw dan nna Bogyoke Aung San Ks. 1000 alu bang tawn da wu ai rai. Ya Pang Lung mare e sa yu yang dai masat Nlung shadaw hpe mu lu na re.

 

GA SHAKA LAIKA

 

Myen Mung (Governor) Inglik Mung Up Duwa a Mung Bawng Ginjaw hkringmang salang n kau mi hte Sam Saw Bwa ni yawng hte kaga Sam mung Jinghpaw bumga hte Hkang bumga na dat kasa salang ni lawm nna Pang Lung mare e hpang ai Zuphpwng hta jahkring mi na Myen Mung Atsuya hte lawan htum ai hku myit hkrum shabawn dat yang, Sam, Jinghpaw hte Hkang ni Shanglawt lawan lu na re ngu kam ai majaw lawu de na hte maren myit hkrum da saga ai.

 

1. Bumgu masha ni a Mung Bawng Giinjaw kaw na myit Hkrum lata la ai bumga masha ni a kasa salang langai mi gaw bumga ni hte seng nna Myen mung Mung up du wa a Mung bawng Ginjaw hta Mungbawng Hkring Mang salang hku san tawn da ai.

 

2.Dai kasa salang wa hpe (Governor) Inglik Mung Up du wa a Mung Bawng Gin Jaw hta ( Wungyi ) salang hku san tawn na Maigan mungdan ni hte matut mahkai ai lam hta mung makawp maga ai lam ni hte maren bumga ni hpe uphkang ai magam bungli ni hpe mung Upadi hte daw dan nna.ndai Mung Bawng Ginjaw kaw na up hkang na. Bumga ni hte seng ai hkring mang salang wa hpe, bumga ni hpe up hkang na ahkang aya ni ap ya na.

 

3. Dai bumga masha hkring mang wa hpe karum na matu kaga bumga masha shi hte amyu n bung ai salang lahkawng hpe Mung Bawng Ginjaw hta shalawm la na. Dai salang yan gaw tinang hte seng ai bumga ni a uphkang amu magam ni hpe lit la ra ai. Hkring Mang salang kaba wa chyawm gaw bumga ni yawng a up hkang lam hta lit la ra ai.

 

4. Bumga masha Hkring mang kaba wa gaw Mung Bawng Ginjaw hta bumga ni hte seng ai amu bawng zuphpawng hta shi hpe tau ai hkring mang salang yan mung, sa bawng lawm na ahkang nga ai.

 

5. Lahta de myit hkrum ai hte maren, ( Governor) Mung up du wa a Mung Bawng Ginjaw hpe bai jat na ra timung bumga ni a madu up hkang aya hpe n sum n mat hkra galaw lajang na. Bumga ni hpe up hkang ai lam hta bumga masha ni tinang ra sharawng ai hku maw mawn na ahkang aya hpring tup lu mai ai ngu madung da nna hkap la ai.

 

6.Mung Hpawm Myen Mung kata e Jinghpaw Mung ngu dai daw nna dai Jinghpaw Mung a lamu ga jarit hpe masat na mungga lam hpe Shawa Mung Bawng Rapdaw hta tang madun daw dan na raitimung dai mung daw (Jinghpaw Mungdaw ) shabyin hpang wa na matu, 1935 ning Myen Mung Atsuya upadi hte maren. daw 2 ngam tawn da ai lamu ga ni hpe up hkang ai zawn Myitkyina hte Bhamo districts ginwang lamu ga ni hpe up hkang ai lam hte seng nna. bumga hkring mang salang wa hte shi hpe tau ai salang yan hte bawng ban ra ai.

 

7. Bumga e nga ai mung masha ni gaw democracy mungdan ni hta lu ang ai madung ahkang aya ni hpe hkam sha lu na.

 

8. Ndai Ga Shaka Laika hta myit hkrum tawn ai lam ni a majaw Sam mung e ya ahkang jaw tawn ai madu ra sharawng ai hku gurnhpraw jai lang ai ahkang aya n sum n mat lu na.

 

9. Ndai Ga Shaka laika hta myit hkrum lajang tawn ai lam ni a majaw Jinghpaw hte hkang bumga ni Myen mung Atsuya hkanse kaw karum ai ja humhpraw ni n sum n mat lu na. Myen mung Atsuya hte Bumga masha hkring mang kaba wa hte tau ai hkring mang yan lawm ai gumhpraw jai lang ai lailen hte maren Jinghpaw hte Hkang bum ni hta mung lajang ya na matu bawng ya na.

 

GA MADIM

 

Pang Lung Ga Shaka byin wa ai lam madung gaw, Myitkyina hte Manmaw ginwang na Jinghpaw dat kasa salang ni. myit hkrum daw dan ka lajang sa ai mungga ni hta Sam Saw Bwa ni hte Sam Mung Masha Shang lawt Hpung ningbaw ningla ni jawm myit hkrum jahkrum daw dan ai Ga Shaka re ai lam hpe Jinghpaw Wunpawng myu sha ni, matsing sum hting tawn na matu hpang jahtum ka shana dat ai. " Mung Masa Usa salang ni gaw wai mat wa sai raitimung Amying gaw ahkrung nga na re"

Wa Baw Zau Rip

Source ; Duwa Wabaw Zau Rip a numhtet ga ni.