DASSK a Laika

Tsaw ra hkungga ai myitsu ni,
DASSK a laika hpe lu hti sai, Ginjaw de na shalai jaw ai majaw grai chyeju dum let ndai sumtsan shakram laika gadun hpe hpang dat nngai re.

1. DASSK a laika hpe grai myit n dik, myit n-gun n lu ai hku hkam sha nngai. Hpa majaw kun?
A. Shi shawng ningnan ga-hpaw hku nna Munghpawm hpe "myu-hpawm" hku gaw gap sharawt tawn ai re, nga sai. Teng ai, jaw sai. Tim 1947 e hpang nna dai ni du hkra dai "munmghpawm = myu-hpawm" ngu ai ningmu masing mahkyen hpe matut nna n tat kau ai sha manat tawn ai ni hta rawt malan masa hkan ai kaw du hkra shakut ai gaw "ethnic" ngu shamying hkrum ai anhte Myen n re malawm ni sha rai ga ai. Ndai lam shi soi-sam pyi n tsun hkra ai. "Panglung " a lachyum dai ni KIO, KNU, NMSP hte SSA a lata hta, myit masin kraw lawang kata e chyu sha ngam mat sai kun? DASSK ndai lam hpe malap kau sai kun?

B. DASSK a laika hta KIO, KNU, NMSP, SSA ni hpe Thein Sein hte mungmasa ladat hku bawng ban jahkrup hkat na matu simsa lam jawm tam ga, nga ai. Maisa, rai yang anhte malawm amyu ni 1947 nna dai ni du hkra bang hkrat wa ai du-daw sai-hkaw arang hpe shi hpa rai n tsun hkra ai kun? Simsa ai lam galaw yang mung dai arang hpe n mu ai, n sawn shalawm ai hku rai ra na kun?

C. Hpa rai nna gap-hkat jahkring ai hpe chyu sha madung tawn nna anhte a kaba la ai arang hpe n mu ya ai kun? Shanhte Myen gumshem uhpung kata e n ru n ra rai gan byin ai ten hta sharai la na matu "aten mari ai - buying time" mahtang lama madung rai kun? Myit hta asan sha mahtai n mu lu nngai law. Asan sha chye na ai ni nga yang garum la marit.

D. DASSK anhte hpe simsa lam galaw na shadut ai shani hta nan nan Tin Aung Myint Oo maga de nna 1) Miwa kaw na hkoi la ai gumhpraw lu la jang lawu tsang hpyen du ni hte hpyen ma ni hpe jarit malu masha bai lu jaw na re, 2) dai aten hta SSA hpe shamyit kau, 3) Wa hpe bai la kau re ai mai byin na re, nga ai nsen mung pru ai hpe n madat nna ASSK hpe sha madat na hku rai kun?

E. Ndai ten hta sinpraw htingbu wa gara hku rai nga ai kun? KIO hpe simsa la na shadut nga ninglen Tin Aung Myint Oo alat nga ai gumhpraw shapraw ya na rai kun?

F. October shata hta UN rapdaw kaba zuphpawng galaw na aten re; ya aten hta mawng ai shiga hta EU gaw, Thein Sein gumshem jaubu ni hpe A. human rights tara tawt lai ai manghkang, B. mungdan shawa hpe mungup masa e n shalawm ai gumshem lailen ladat lam ni a majaw, EU woi awn nna Myanmar hpe adawt na zawn nga ai lam mawng nga ai. Ndai majaw "gap-hkat jahkring simsa lam" wa manu grai tsaw wa ai hku rai kun?

G. Gap-hkat jahkring simsa lam gaw, KIO, KNU, NSMP hte SSA hpe shading nna tsun nga ma ai. Ndai ni gaw, jet ai democracy masa shadut ai ni re, dai majaw Thein Sein a uphkang masa hte nhtan shai taw nga ai mahkrun hkan ai ni re. Ndai ni hpe gan shazim ai masa gaw Thein Sein a matu myiman n sum na lam sha rai kun?

Dai ni na mabyin shiga mawng ai hta DASSK a laika mung mawng lawm shang wa nna baw nu loi mi hkanu mat sali ai. Nanhte tsaw ra ai hpu nau ni gara hku mu lu myit ta?

Hkungga let,
SK