KIA, Masat (9) Dapdung Hpyenla ni Myen Htawng langai shang zing

Nam-un Mare grup-yin

KIA, masat (4) dapba npu, masat (9) dapdung hpyenhpung ni September 21, 2011 (Chyanun) ya shani ginra shimlam a matu ginra gawan hkawm nga yang Nam-um hte Dima mare lapran na Shwe Pyi Thit shara hta nga ai Myen asuya a Htawng bungli dabang sin ai Balik ni hkap gap ai majaw 1:00 pm ten daram hta gap hkat ai lam chye lu ai.

Gap hkat ai shara gaw Muse – Lashio mawdaw lam makau na Nam-um mare kaw nna, mile 8 shang ra ai shara kaw rai nga ai. Dai Htawng bungli dabang a hkra maga kaw gaw Myen asuya a Kani Dawn dabang langai nga ai lam mung chye lu ai.

KIA, masat (9) dapdung hpyenhpung ni hpe Myen asuya balik ni shawng gap bun ai majaw, KIA hpyenla ni bai htim gap wa ai hta Myen asuya balik ni yawng hprawng ayai mat wa ai lam mung chye lu ga ai. Dai majan hta Myen asuya balik marai (8) hpe KIA hpyenla ni lu rim la ai hte M-22 sinat lau (4), sinat kadun lau (4) mung lu zing la ai lam chye lu ai. Dai hta, Htawng kata rawng nga ai, Htawng masha marai (55) hpe mung Mungkan Simsa lam masat nhtoi hku nna, yawng hpe shale dat ya ai lam mung chye lu ai. Dai htawng masha ni hta mung masa la, Rawt Malan hpung na hpyenla ni, Kani manghkang byin ai ni lawm ai lam chye lu ai.

Dai ginra hta sin nga ai, Myen asuya Balik ni gaw laiwa laisa ni hte grup-yin mare masha ni hpe jahkrit shama, jep shagyeng ai lam galaw ai ni re hpe mung na chye lu ga ai. KIA hpyela ni kaw nna Htawng bungli dabang hpe shang zing ai lam galaw ai raitim, dai shara a hkra maga kaw nga ai, Kani dawn dabang hpe tsepkawp sa ahtu hkra ai lam hpa galaw ai hpe mung chye lu ga ai.