Laiwa Sai Nayi-hkum 12-24 laman byin ai Majan Shiga

HK.L.Y (397) DAP UP HPE LU GAP KAU SAI

Masat (2) KIA uphkang ginra, Yuzana company ni galaw da ai mahkrai hpe mana de 6-15-2011 Dap Dung (14) ni bawm kapaw kau ya ai hpe sa gawan na matu sa wa ai, Jahtu Zup Hka La Ya (397) Dap Dung Up Lat Du Up Jum Thein Maung Soe (Yuzana company yu reng Du wa ) hte hpyen la marai (10) daram daina maga 6-16-2011 hkying 3:00pm(myenmung aten) ten hta Masat (14) Dap Dung myu tsaw hpyen la ni kawn Sharaw Gan Hka mahkrai kaw Bawm kapaw kau sai.

Shanhte jawn sa wa ai 4W modaw mung yawng ayai mat nna, Jahtu Zaup Tat Yin Mu Lat Du Up Jum Tin Maung Soe (Yuzana company yu reng Du wa ) wa dai kaw kalang ta si sum mat sai na chye lu ga ai.
------------------------------------------------
LAJA YANG SHIGA

Mani Laja yang mare na Balik dap hpyen dap ni dawm di, grai kabu myit pyaw let wa wa ai hpyen la ni hte Balik ni jawn ai maw daw hpe Nam San Yang hte Laja Yang lam lapran kaw KIA ni gap kapaw kau ai majaw (20) jan hkra mat ai lam shiga shang wa ai.
------------------------------------------------
DAP BA(4)

Dap Ba (4) de dai hpawt byin ai majan hta myen de na hpyen la marai (6) hpe lak nak hte hpawn lu rim ai lam shiga shang wa ai.

-----------------------------------------------
MAHKRAI KAPAW AI LAM NI

Masat (2) Dap Ba Uphkang ginra rai nga ai,


(1) Lidu lam, Yuzana Company kawn galaw da ai mahkrai (2) hpe KIA Dap Dung (14) kawn nhtoi;- 15-6-2011 ya shana, hkying 10:00 pm daram ten hta jahten kau sai. Ndai mahkrai (2) gaw Lidu lam ntsa nre. Kaga shinggan Yuzana company bungli maden shara matut mahkai hkrun lam mahkrai re.


(2) Hpakant Modaw lam Kamaing hte Lawng Hkang lapran mahkrai (2) hpe nhtoi;- 15-6-2011 ya shana, hkying 10:00 pm ten hta KIA Masat (6) Dap Dung kaw nna, jahten kau sai.


(3) Hpakant-Gwi Hka Modaw lam Hopin hte Namawn lapran mahkrai (2) hpe nhtoi;- 15-6-2011 ya shana, hkying 10:00 pm daram ten hta KIA Masat (26) Dap Dung kaw nna, jahten kau sai.

-----------------------------------------------------
NAM SAN YANG SHIGA

MANI NAM SAN YANG MARE MAKAU KAW GAP HKAT AI HTA MYEN HPYEN LA (30) SI NNA, SHANGLAWT (KIA) DE NA GAW (2) HKALA AI LAM SHIGA SHANA WA AI.