Pages

Tuesday, June 28, 2011

Daini na Shang Lawt Majan hte Shiga Dap ni

June shata 25 ya shani Jinghpaw Online Shiga Dap langai rai nga ai KNG kaw na Miwa Mung Asuya ni Mangshi Mare e Shim dik ai hku hkrum bawngban ai, Myen Hpyen Du kaba ni hte Miwa Asuya ni a lapran na zuphpawng hta Myen Hpyen Hpung hte KDA hpung ni pawng nna KIA Dap Ba (3) hte KIO/KIA Ginjaw Laiza hpe gasat zing ai shaloi Miwa Asuya ni ga jarit lai na ahkang jaw sai lam hpe Shiga langai hku bang dat ai hpang VOA, Mizzima, Moetheezun, Irrawaddy News .. myen online news websites/bloggers yawng hkan mungkan ting ndai shiga chyam bra mat wa sai. KNG hku nna lu la ai shiga hpe gara hku yaw shadat let bang dat ai lam gaw shanhte sha chye na re. Ngai kam ai gaw ya ten hta Jinghpaw Wunpawng yawng ngu na daram tinang a hpyen hpung hpe awng padang lu shangun mayu ai lam gaw ga lahtum nshut rai nga ai.

Shingrai Mungkan ting na Myenmung hte seng ai Shiga dap ni dai shiga hta la-kap nhtawm bungli kyin mat ai sha n-ga Jinghpaw Wunpawng ni a lapran mung ram ram ashun gara mat ai gaw teng sha rai nga ai.

Ndai shiga hte la-kap nhtawm ngai langai hku sawn dinglik yu ai shaloi lawu na hte maren langai hpang langai dinglik yu na lam nga wa ai.
(1) Miwa Asuya hte Myen Hpyen Du Kaba ni hkrum hkat ai gaw hpa majaw.
(2) Myen Hpyen Du Kaba ni tsun ai hpe Miwa Local Asuya kaw na dawdan lu na kun?
(3) Laiza hte Dap Ba (3) gasat na matu ga jarit lai shangun ngut yang myen mung a manghkang ngut mat na re ngu Miwa Asuya kaw na sawn la na kun?
(4) Miwa a Foreign Policy rai nga ai, “kaga mungdan ni a dinghku manghkang hta nshang shanut lawm na” ngu ai hpe nhtan shai ai hku nna Mungkan ting a man e bai chye na shangun sana kun?
(5) Thein Sein hte Miwa Gumsan wa May Shata hta hkrum hkat sai, lama nna dai shaloi KIA/KIO hpe shamyit kau na matu jawm bawng dawdan sai rai yang June 8/9 Sanggam Post gap ai kaw na dai ni du hkra Myen maga de Miwa Asuya shang lawm ai sakse nga a ni? Myen Hpyen kaw nna nga manga shanhte a n-gun yawng lang nna gasat bang wa ai majan rai kun?
(6) Miwa Asuya hte Myen Hpyen Du ni gaw ya byin nga ai majan hte seng nna hkrum shaga hkat ai gaw mungdan langai a lamu ga jarit shim lam hte seng nna galaw nan galaw ra ai bungli nrai ni? Grau nna Majan a jaw e Kachin Refugees ni hpe Miwa Asuya nhkap la ai sha bai gau nhtang ai ngu mungkan ting garu wa yang Miwa mungdan a Sari Sadang hte Mung Masa gara de yawng wa mai nga ai kun?

Ngai sawn lu ai, Myen Mung Maden Hpyen ni KIO/KIA hpe gasat lung wa ai lam madung gaw:
1. KIO/KIA kaw na Myen Hpyen ni a BGF plan hpe ninghkap kau dat ai majaw.
2. 2008 Nargis Constitution kaw masat bang shalawm ai Makawp maga dap langai sha nga ra na ngu ai hpe Thein Sein Asuya nnan lung wa ai hte maren yawng hpe kasi madun hpang dat ai lam re, ngu nna sha mu mada ai.

Rai yang KIA kaw na Myen hpyen ni sawn da ai hku nrai, laklai ai zai ladat ni hte ninghkap gasat wa ai hpe kalang lata chye mat ai, mungkan ting Hpyen Du ni naw Ushoi jum ai Asuya nnan re, Kachin Refugees ni gaw Myen Asuya uphkang ai Mare de nhprawng ai sha KIO/KIA uphkang ai shara de hprawng sa wa ai majaw Myen hpyen ni a mung masa ram ram hkrat sum mat manu ai, dai majaw kalang lata hpyen hpe shazim masu nhtawm kaga Nam-nyan(Bawnu) bai shaw nga ai ten rai nga ai hpe sawn lu ai. Thein Zaw hte WMR salang ni shakut ai lam gaw mai galaw ai kata hta mungkan chye hkra marawn ai zai ladat langai hta jan nna nmu mada ya ai.
G
rau nna ndai Majan gaw Thein Sein Asuya nnan a matu mungkan a man e myi man ram ram hten mat ai lam mung rai nga ai, hpa majaw nga yang mungkan ting kaw na(UN lawm) Myen Mungdan a manghkang hte seng nhtawm lit nga ai Mung Masa Hpung ni, Amyu Sha Hpung ni hte Asuya ni hkrum bawng ban na hpe shadut nga ding yang aten re sha n-ga Hpyen Du kaba ni Asuya nnan hpe U-Shoi matut jum/njum azi yu nga ai ten ya na zawn roi mara shanhte kam ai hku galaw wa ai lam gaw shanhte Myen Asuya ningbaw ni a lapran hta pyi ningmu hprai shai wa mai nga malu ai.

Shiga hte la-kap nna mahkrum madup kaba langai hpe myit dum ai gaw: American Hpyen Dap ni Iraq de nshang shi yang mungkan hpe Myet-Le(Majic) madun na matu American Hpyen Jaubu kaba nkau Shiga dap langai hpe lang wa sai hpe shiga langai hta hti yu nngai. Iraq hpe gasat na matu lawng lam law law nmu ma ai shaloi WMD ngu ai ga baw hpe sawn shapraw ma ai.. dai hpang American Kaichyan Dap salang langai gaw Shiga Dap na salang langai(num) hte Sadam wa a lawu na Hkring-mang salang langai hpe lagu hkrum shangun ai lam chye lu ai..dai Hkring-mang salang wa gaw Iraq mungdan e WMD program nnga sai, 1986-87 hkan kaw na jahkring kau sai lam dai repoter wa hpe tsun dan sai.. raitim American Kaichyan Dap kaw na salang wa gaw dai shiga dap na Reporter wa hpe Iraq e WMD program galaw nga dingyang re ngu ai Report Masu hpe mahtang American Shim Lam Dap Ginjaw hte Asuya Ginjaw de dai report hpe ka tang shangun sai. American Asuya mung dai report hpe kam nna Iraq de majan gasat zing la kau sai.. Iraq hpe zing kau ngut ai hpang daini du hkra dai report hta rawng ai WMD hte seng ai nmu tam ma ai.. dai majan kaw na American salang nkau sharin la ai lam gaw dai WMD Report a majaw American Hpyenla 4,500 daram rai nna Iraq mung shawa hte yawng pawng yang 104,500 grup yin majan hta si hkrum sai lam rai nga ai.

Dai majaw ngai hku nna Jinghpaw Wunpawng mung shawa hpe shadut mayu ai gaw: Shiga dap ni hku nna mungkan hta lam amyu my hku grin nga ma ai, shanhte hpe jaw ai/shut ai dinglun na matu mung yak nga ai. Tinang hkum nan sadi maja sawn dinglik nhtawm ga-yi ga-la hpe chye gin hka lu na gaw ahkyak madung rai nga ai.

Hpungdim hku nna tsun mayu ai lam gaw: Myen Hpyen Asuya shagu manghkang byin nga sai ndai Mungdan hpe nlak lai ai mung up ladat hte matut uphkang nga ai majaw Majan ndai gaw zim mat na lam nloi ai. Myen Mungdan ngwi pyaw simsa wa na matu gaw, Myen Hpyen Du ni a myit jasat nan galai shai ra nga ai, mungkan ting kaw na azi yu nga ai mung dai lam sha rai nga ai, Miwa Asuya kaw na mung htingbu Mungdan Simsa yang she hpaga yumga hpe ndut ndang galaw mai na hpe atsawm chye chyalu re ngu sawn lu ai.. KIO/KIA hte Myen a lapran na kasat gala ai lam gaw (60) ning na wa tim Kachin ni htum mat ai lam nnga ai sha grau galu kaba law htam wa ai hpe chye nga chyalu rai nga ai.. Laiza hte Dap Ba(3) hkrat sum mat nna KIO/KIA ni kalang lata htum mat na re ngu sawn la na gaw nrai nhten, bai nna KDA ningbaw ningla ni hte dap shawa ni hku nna mung tinang a lu lawm lam sha yu nna Jinghpaw shada sat nat hkat na daram sai hten mat na ni gaw mi shang nrai kun? ngu sawn maram ai lam hpe tang madun dat nngai law.


Yumaya Hpyen Magam Gun Dingsa

1 comment:

  1. grai hkrak ai dinglun lam rai nga ai. raitim, myen pyen asuya gaw kaga mungdan ni n galaw n myit ai hpe myit chye galaw chye ai ni rai ma ai hpe naw dum ra ai. mungkan wuhpung wuhpawng ni mung tsang ai nga ai ga hte sha dai hku yu shalai ai ten ni mung nga wa sai. Miwa mungdan mung UN security council kaw myen mung hpe a hkyak la na matu bawng shagu shanhte a vito power hte hkrai n dang kau ya ya re ai lam ni mung nga lai wa sai. dai majaw lam shagu mai byin wa ai majaw anhte wunpawng myu sha ni shadi maja let nga ra ai. anhte wp mungdan a matu gaw wp sai rawng ai nang ngai anhte ni yawng tinang nan Karai Kasang hta manoi let shakut la ra ai. kadai wa galaw ya na re ngu la taw nga n mai ai. tinang myu sha ni nan atsam dat ra sai re.

    ReplyDelete