June shata(9) ya shani Sanggang ginra kaw na bai byin hpang wa ai majan ndai gaw daini na ten du hkra nzim lu shi ai. Majan ndai gaw 1961 ning kaw na Kachinland hta byin hpang wa ai rai yang shaning 50 pyi jan mat hkra mungkan hta galu dik ai Dinghku Majan hku nna labau sara kaba ni tsun lang hpang wa nga masai re. Majan ndai galoi ngut na? Myen Hpyen Jaubu ni hte Myen Amyu sha Nationalist ni hta jan nna ndai gasan hpe lu htai na lam nnga na nhten ngu sawn maram lu nga ai.
Myen Asuya hte KIO/KIA lapran naw shai hkat nga ai mung masa ningmu law law nga ai kaw na kaba dik ai manghkang hpe tsun ga nga yang – Myen Asuya hte Myen Nationalist ni kaw nna Kachin hte kaga Myen Mung ethnics malawm ni hpe Equal Rights jaw na matu myit tawn ai lam nnga wa yu ai zawn hkyen shajin tawn ai lam mung ya du hkra tsep kawp nnga shi ma ai, shanhte tsun nga ai gaw Gap Hkat jahkring nhtawm Rawt Malan galaw nga ai ningbaw ni hpe hpaga ga na ahkaw ahkang hpaw ya na, shanhte jum hpareng nga ai mung masa npu e shang lawm na matu hte gau ngwi ngwi laknak lang ai masa hpe dawm mat wa na lam rai nhtawm, KIO/KIA hte kaga ethnic rawt malan ai amyu sha ni hku nna gaw tinang amyu sha ni a maren mara ahkaw ahkang ni hpe nlu dingsa lachyum pru ai mung masa bawngban sa wa na matu Myen Asuya hte Myen Nationalist ni hpe matut pressure jaw mat wa na ngu ai lam ndai lahkawng gaw Wan Leng Lam lahkawng zawn langai hte langai hkrum wa lu na matu grai loi ai bungli nrai nga ai.
Raiyang June 30, 2011 kaw na Col. Than Aung Myen Dat kasa hpung ni dat nhtawm gap hkat jahkring ai lam hte Mungdan Simsa lam ngu ai ga baw ni hpe gayau gaya nga nna lang hte lang hkrum bawngban ai lam nga ai zawn, maga myi hku nna KIO/KIA hpe n-gun kya, hten bya mat wa hkra mung Myen Asuya hte Myen Nationalist ni hku nna dingyang shakut nga ma ai. shingrai lani hte lani grung kaba wa nga ai Kachinland kata na majan a majaw Myen Asuya hte Myen Nationalist ni tsun nga ai Ritkawp hkan ai Democracy Myen Mungdan nnan gaw sharawt sa wa na lam ngu ai mung majoi nbung gawut taw ai zawn byin nga sai hpe Myen Asuya hte Myen nationalist ni nan chye nga chyalu rai malu ai.
Hpyen Majan ngu ai gaw lani myi na nhtoi hta zim mat wa ra na sha rai nga ai, raitim Mung Masa Majan ngu ai gaw zim mat na nmai byin nga ai. Mungkan hta Democracy masa kaba dik hte galu kaba grin nga sai USA Mungdan gaw Mung masa majan kaba dingyang gasat hkat nga ai mungdan re ngu mai tsun lu nga ai.
Myen Asuya hte Myen nationalist ni gaw Myen Mung baw-sang malawm amyu(ethnic) ni hpe mung masa majan dang hkra galaw na matu zai ladat amyu myu shapraw nhtawm lagaw lahkam htawt hpang wa nga masai..tsawra myit hte anhte hpyi jahtau nga ai maren mara ahkaw ahkang ngu ai hpe loi loi hte jaw na lam ngu ai mung nmai byin ai lam rai nga ai.
Ntsa lam prau shalau yu yang, June shata (9) kaw na daini du hkra shata Kru laman Jinghpaw Wunpawng mung shawa ni kaw na mung masa shamu shamawt ai lam nmu mada ai, Mandalay Buddist monks(Myen Hpungkyi) ni woi awn nhtawm Majan zim na matu kyuhpyi ai lamang hte gangbang hkaw tsun hpawng ni zawn anhte nlu galaw ga ai..1988 ning jawngma kasu ai zawn Lam ntsa lam hkawm n-gun madun ai zawn re mung nbyin pru wa ga ai, raitim Jinghpaw Wunpawng Amyu sha ni a kata hta gaw gara prat hta mung nbyin pru wa yu ai amyu sha kahkyin gumdin ai lam hpe lu la ga ai sha nrai Myen Hpyen ni a zingri zingrat ai lam hpe ninghkap gasat ai lam hta mung Jinghpaw Wunpawng Mung shawa ni kaw na madi shadaw garum ntum ni hpe mau na zawn rai KIO/KIA ni hkam la nga masai.. nmu lu tim grau kahkyin gumdin wa ai lam ni gaw Myen asuya hte Myen nationalist ni hkrit tsang dik htum rai na hpe asan sha maram lu nga ai..
Anhte Jinghpaw Wunpawng amyu sha ni hku nna dinghku majan ndai zim mat ai hpang Mung Masa Majan hpe matut gasat na matu jin nga saka ai kun?
1994 ning KIO hte Myen Hpyen Asuya gap hkat jahkring nhtawm Hpyen Majan shazim kau ai hpang Jinghpaw Wunpawng Mung shawa kaw na KIO/KIA hpe Myen Hpyen ni hpe n-gap ai majaw ram ram dinglun lai wa sai lam nga wa yu sai..Mung masa majan hpe mung KIA hpe sha nawng(kam) tawn nhtawm mung shawa ni kaw na Mung Masa shamu shamawt ai lam nnga yang awng dang na lam gaw ram ram nloi nga ai..dai majaw Jinghpaw Wunpawng amyu sha ni hku nna KIO/KIA hte Hpyen Majan hta pawng hpawm nhtawm lahkrip ra ra gasat lawm, n-gun jaw ai zawn htawm hpang shawng lam na Mung Masa Majan hta raitim shingran kaja, Mung Masa Zai Ladat nnan hte lahkrip ra ra jawm gasat ai raiyang anhte myit mada, ap nawng shakut shaja nga ai amyu sha ahkaw ahkang hpe lu la na re ngu ngai kam sham ai lam hpe tang madun dat nngai rai.
Yumaya Hpyen Magam-gun Dingsa
December 18, 2011
No comments:
Post a Comment