US Jinghpaw Wunpawng ni Myen Gumsan Thein Sein hpe Ninghkap N-gun Madun

US Jinghpaw Wunpawng ni Myen Gumsan Thein Sein hpe Ninghkap

New York September 27, 2012

Daini September 27 ya shani American Mungdan e shanu nga ai mungdaw shagu na Jinghpaw Wunpawng Amyu sha ni gaw UN Zuphpawng hte kaga ahkyak ai zuphpawng ni a matu gan du nga ai Myen gumsan U Thein Sein hpe ninghkap shawa n-gun madun ai lam galaw lai wa sai hpe chye lu ai, n-gun madun ai lam hpe UN Rung daju shawng e shani ka-ang12:00 – 2:00 pm lapran galaw ai rai nna 3:00 – 5:00 pm lapran hta gaw UN – Myanmar Mission rung shawng e galaw ai re hpe chye lu ai. Shang lawm ai marai yawng (70) jan rai nhtawm Kachin Alliance ningbaw ni rai nga ai, Slg. Hkangda Brang San Awng, Dr. Maran Naw Mai, Shayi Lahkyen Ja Seng Mai ni kaw na woi awn ningbaw ai re hpe matut chye lu ai.

Shingrai UN – Myanmar Mission rung ndaw e n-gun madun nga ma yang Myen Dat Kasa Rung salang ni kaw nna kata de saw shaga ai hte maren ningbaw ni rai nga ai Slg. Hkangda Brang San Awng, Dr. Maran Naw Mai hte Shayi Lahkyen Ja Seng Mai ni gaw Myen Dat Kasa Rung kata de shang shaga ma ai lam hpe ningbaw ni kaw na tsun dan wa ai, Kachin Alliance ningbaw ni hpe hkrum shaga ai Myen salang ni gaw U Khin Yi(Immigration), U Thein Htay(Border Affair) hte Myen Dat Kasa U Than Shwe ni rai ma ai lam hpe matut chye lu ai. Shingrai hkrum shaga ai lam hta Myen salang ni kaw nna ya ten Myen Asuya hte laknak lang rawt malan nga ai Ethnic groups malawng hte Cease Fire galaw lu sai lam, Kachin ni hte naw ginrat nga ai lam ni hpe sanglang dan ai lam chye lu ai..U Thein Htay kaw na tsun ai gaw media hte shinggan e tsun tak nga ai lam langai: Kachinland Shawnglam e  “majan kasat nga ai Myen Hpyen Dap gaw President Thein Sein a matsun hpe lale ai ngu tsun kajai nga ai lam gaw njaw ai..Bamar Tatmadaw gaw President Thein Sein a matsun npu e matsun hte maren hkrak bungli galaw nga ai re” ngu asan sha tsun dan ai lam chye lu ai, matut nna U Thein Htay tsun ai gaw Ya President Thein Sein hpe mungkan kaw na grai shakawn shagrau nga ai ten hta nanhte ya na zawn ninghkap ai lam gaw grai nhtap htuk na re ngu tsun wa ai shaloi Kachin Alliance ningbaw ni hku nna gumsan Thein Sein hpe ka ai laika hpe hti dan nhtawm angwi apyaw bai nhtang wa sai lam Kachin Alliance ningbaw ni kaw na chye lu ai shiga ni hpe matut htawn shalai dat ai rai.

Overseas Kachin Association