Myen A Mungdan Dinghku Majan Shazim Masa hte Mungdan Galai Shai Masa

Myen Asuya gaw shang lawt Hpung hta lai nna laga amyu baw sang rawt malan hpung ni hte gap shazim da lu sai nga nna mungkan de n’gun mi alu rai nbung kawut shmawng nga malu ai. Shanhte tsun ai hku teng yang amyu bawng sang laknak lang hpung ni lapran hta zim mat sani? Majan nnga sai kun? Tsun ai hte galaw taw nga ai gaw lamu hte ga shai ai zawn rai nga ai.

Shahte dai hku masu tsun, galaw nga ai gaw maigan mungdan ni hpe mungdan simsa lam galai shai sai ngu ai hpe myawk le madun nna dollar hpa-ga kaba shalen la nga ai lam sha re.

1.      Amyu baw sang ni hte gap jahkring -simsa lam lamang galaw ga baw hte mungkan mungdan de na shang gumhpraw tam lu na matu hpaga galaw nga ai. Sinna maigan asuya ni gaw myen asuya wa mungdan dinghku majan shatsim kau lu na matu garum gumhpraw dolla wan lam hku garum na lam nga nga malu ai. Ga shadawn Norway asuya ni gaw myen mung simsa lam a matu garum na matu dollar wan kaba lam jaw na nga nna tsun nga ai. Dai majaw amyu baw sang lak nak lang hpung ni hpe hkan jahkrum nna zuphpawng galaw dan , hkam daka nnga ai sen jawm mahkret dan re lam ni hpe shiga dap de ka bang shabra rai myawk le galaw madun nga ma ai. tenng sha hpa wa mi shai nga sata? SSA ni gap shatsim myit hkrum ngut masai le hpa majaw matut nna htim gasat ding yang rai nga ai ta? Dai majaw teng sha hkam daga re sakse sak pru ai hku nna bawng ban ai sha nrai yang hkrum jahta ai lam galaw ai gaw myen asuya wa a hpa-ga galaw lam hta grau na amyat lu na lam len ya lawm ai lam sha tai wa chye nga ai.

2.      Mungdan kata mung masa lam galai shai taw nga sai ngu nna mung arawng mi alu nga tsun nga ma ai. Myen myu sha ni matu jawm galai shai nga sai, tim amyu baw sang ni matu hpa baw wa galai shai nga sata? Hpyi kaw nsam amyu myu di chya shatsawm dan nna maigan hpa-ga hpung kaba ni hpe shalen bang taw nga ai lam re. Myen hpyen dap gaw shanhte a hpyenla ni hpe shabrai shaw jaw na gumhpraw pa nlu mat wa ai madang de du nga sai. Dai majaw maigan hpa-ga hpung ni, jak rung kaba ni lawan ladan shang wa nna hpaga galaw wa jang myen amyu ni hta shang gumhpraw chyai wa na lu ai, dai shaloi hpyen n’gun grau bai ja wa na re. Myen myu sha ni hta bungli lu masha law, gumhpraw lu masha law wa na raitim amyu baw sang ni jawm gaw hpa lak lai nna gumhpraw lu wa masa nnga shi ai.

3.      Myen asuya wa teng sha jet ai munghpawm mungdan hpe gaw de mayu ai hte, mungdan ding hku majan hpe zepzi dawm shatsim kau mayu yang;

1) Hpa majaw myen hpyen dap ni n’gun htu dingyang, shamu shamawt dingyang hte majan shatsim ai lam hpe ndau ai lam n’galaw ai.

2) Myen asuya a pali-man hta ding hku majan ni hpe dawm kau lu na lam hte seng nna hpa majaw bawng ban daw dan ai lam n galaw ai ,

3) Amyu bawsang ni nra ai 2008 a munghpawm uphkang tara kanu hpe gram byeng kau ai lam hpa majaw n’galaw ai.

4) Hpa majaw UNFC amyu baw sang dap hpawm ni hpe shaga zuphpawng nna kalang ta mung hpawm a mung masa mang hkang ni hpe nkam hparan kau ai.

5) Myen hpyen dap hte shang lawt gaw, 2011 June majan hpang kawn majan shazim na matu hkrum jahta ai 2012 June 20 e Mai Ja Yang hta bai hkrum ai hte rai yang (7) lang dang rai wa sai tim, hpa majaw asuya maga de na dat kasa ni sa shagu grak lagra re daw dan mai ai ga baw nnga ai sha ten shama hkrum nna ngut mat mat re ta?..ndai zawn hkrum jahta ai gaw maigan dollar hpa-ga galaw ai lam re.


By M.Zau Hkum
June 21, 2012

----------------------------------------------------------------------------------------------------------------------

Lahta na ningmu laika gaw laika sara M Zau Hkum a ningmu rai nna Overseas Kachin Association a ningmu nre lam shana ga ai.